"Real" Madrid sürünə-sürünə finala çıxdı

Dünən keçirilən UEFA Çempionlar Liqasının yarımfinal oyununda Madridin "Real" futbol klubu öz meydanında Münhenın "Bavariya" komandasını qəbul edib.

Mediainfo.az-ın verdiyi məlumata görə bir həftə bundan əvvəl səfərdə rəqibləri üzərində 2:1 hesabı ilə qələbə qazanan madridlilər bu dəfə ilk dəqiqələrdən çətin vəziyyətə düşüblər. Oyuna sürətli hücumla başlayan münhenlilər 3-cü dəqiqədə Kimmixin vurduğu qolla hesabı açıblar. Amma özünü ələ alan meydan sahibləri 11-ci dəqiqədə Benzemanın başla vurduğu qolu ilə hesabı bərabərləşdiriblər. Birinci hissə bu hesabla başa çatıb. İkinci hissənin əvvəlində isə müdafiəçilərin və qapıçının kobud səhvindən istifadə edən Benzema ikinci topu qonaqların qapısından keçirib. 63-cü dəqiqədə isə Xamesin vurduğu qolla qonaqlar hesabı bərabərləşdiriblər. Bundan sonra oyun daha gərgin mübarizə şəraitində keçib.Qonaqlar dəfələrələ hesabda onə çıxmaq imkanlarına malik olsalar da bundan istifadə edə bilməyiblər. Beləliklə "Real" Madrid bu dəfə də bəxti gətirməsi nəticəsində sürünə-sürünə də olsa finala çıxa bilib. Qeyd edək ki, son iki-üç oyunda Ronaldonun varlığı demək olar meydanda hiss edilmir. "Real"ın finalda rəqibinin kim olması məsələsinə isə bu gün keçiriləcək "Roma"-"Liverpul" matçında aydınlıq gətiriləcək.

Əziz Mustafa

Çempionlar Liqası

Yarımfinal (cavab oyunları)

1 may

"Real" – "Bavariya" - 2:2

Qollar: K. Benzema, 11, 46 - Y. Kimmix, 3; H. Rodriges, 63

Baş hakim: Cüneyt Çakır (Türkiyə)

Madrid, "Santyaqo Bernabeu" stadionu

İlk oyun – 2:1

"Real" (İspaniya): 1. Keylor Navas, 4. Serxio Ramos (k), 5. Rafael Varan, 12. Marselo, 17. Lukas Vaskes, 10. Luka Modriç, 23. Mateo Kovaçiç (14. Kasemiro, 73), 20. Marko Asensio (6. Naço, 88), 8. Toni Kroos, 7. Kriştianu Ronaldo, 9. Kərim Benzema (11. Qaret Beyl, 72)

Ehtiyat oyunçular: 13. Kiko Kasilya, 15. Teo Ernandes, 24. Dani Sebalyos, 21. Borxa Mayoral

Baş məşqçi: Zinəddin Zidan

"Bavariya" (Almaniya): 26. Sven Ulrayx, 4. Niklas Süle, 5. Mats Hummels, 27. David Alaba, 32. Yozua Kimmix, 6. Tiaqo Alkantara, 24. Sorentin Tolisso (2. Sandro Vaqner, 74), 11. Hames Rodriges (8. Xavi Martines, 84), 25. Tomas Müller (k), 7. Frank Riberi, 9. Robert Levandovski

Ehtiyat oyunçular: 22. Tom Ştark, 30. Niklas Dorş, 19. Sebastian Rudi, 15. Lars Lukas Mai, 13. Rafinya

Baş məşqçi: Yupp Haynkes