ABŞ İranla müharibədə MQ-9 Reaper pilotsuz təyyarə parkının dörddə birini itirib

İranla müharibə zamanı ABŞ Silahlı Qüvvələri ən azı 45 ədəd MQ-9 Reaper pilotsuz uçuş aparatı itirib. Oxuməni.az xəbər verir ki, bu barədə “The Washington Post” vəziyyətdən məlumatlı dörd amerikalı məmura istinadən məlumat yayıb.

ABŞ Hərbi Hava Qüvvələrinin məlumatına görə, bir Reaper pilotsuz təyyarəsinin qiyməti sensorların və silahların konfiqurasiyasından asılı olaraq 30–50 milyon dollar arasında dəyişir. 45 aparatın itirilməsi nəticəsində ümumi zərərin 1,3 milyard dolları keçdiyi bildirilir.

Bu dronlardan Hörmüz boğazı ərazisində kəşfiyyat aparmaq və dəqiq zərbələr endirmək üçün fəal istifadə olunub. Nisbətən aşağı sürət və aşağı hündürlükdə uçmaları onları İran hərbçiləri, eləcə də Tehranın dəstəklədiyi Yəmən və İraqdakı qruplaşmalar üçün asan hədəfə çevirib.

Bununla belə, rəsmi şəxslər bildirirlər ki, bütün dronlar vurulmayıb. Aparatların bir hissəsi onlarla əlaqənin qəfil itirilməsi nəticəsində qəzaya uğrayıb.

Münaqişənin genişmiqyaslı mərhələsinin başlanğıcında ABŞ ordusunun arsenalında təxminən 185 Reaper dronu olub: 165-i Hərbi Hava Qüvvələrinin, 20-si isə ABŞ Dəniz Piyadaları Korpusunun tərkibində idi.

ABŞ Dəniz Piyadaları Korpusunun sözçüsü, podpolkovnik Coşua Benson bildirib ki, onun qurumu heç bir dron itirməyib. Bunun səbəbi həmin aparatların əsasən Asiya-Sakit okean regionunda yerləşdirilməsi olub.

Almaz Həsənli