FİFA 2026-cı il Dünya Çempionatı mükafat fondunu təzyiq altında artırıb

Beynəlxalq Futbol Assosiasiyaları Federasiyası (FIFA) 2026-cı il Dünya Kubokunda iştirak edən milli komandalara ödənişləri artıracağına söz verib. Bu barədə Oxuməni.az “The Guardian” qəzetinin məlumatına istinadla xəbər verir.
Qərar turnirə hazırlıqları çox baha başa gələn hesab edən milli assosiasiyaların təzyiqi altında verilib.
2025-ci ilin dekabr ayında FİFA Şurası 727 milyon dollarlıq mükafat fondunu təsdiqləyib ki, bu da onun tarixində rekord göstəricidir. Bu məbləğ iştirakçı 48 ölkənin hər birinə ən azı 10,5 milyon dollar zəmanət verirdi. Lakin bir neçə federasiyanın nümayəndələri bildiriblər ki, ABŞ, Kanada və Meksikada uçuşlar, yaşayış və vergilər üçün yüksək qiymətlər, komanda yaxşı çıxış etsə belə, gəlirləri sıfıra endirə bilər.
Buna görə də, FİFA 28 apreldə Vankuverdə keçiriləcək şura iclasında əlavə maliyyələşdirməni təsdiqləyəcək. Təşkilat üzv assosiasiyalarla gəlirlərin artırılması ilə bağlı müzakirələr apardığını təsdiqləyib. Buraya həm turnir iştirakçılarına birbaşa ödənişlər, həm də bütün 211 milli federasiya üçün genişləndirilmiş inkişaf proqramları daxildir.
2026-cı il Dünya Kuboku ilk dəfə üç ölkədə - ABŞ, Kanada və Meksikada keçiriləcək və həmçinin 48 komandaya qədər genişləndiriləcək. Turnir 11 iyun - 19 iyul tarixləri arasında davam edəcək.
Almaz Həsənli