"Barselona" "Kamp Nou"nun tutumunu artırmaq üçün yerli hakimiyyətdən icazə almaq istəyir

Kataloniyanın "Barselona" klubu "Kamp Nou" stadionunun şimal tribunalarının açılması üçün yerli hakimiyyətdən icazə almağı planlaşdırır. Bu barədə “Mundo Deportivo” məlumat yayıb.
Nəşrin məlumatına görə, katalon klubu stadionun mövcud tutumunu 45 000-dən 62 000 tamaşaçıya qədər artırmağa imkan verəcək 1-ci dərəcəli lisenziya almaq üçün şəhər şurasına bütün lazımi sənədləri təqdim edib. Lisenziya şimal tribunalarının yuxarı və aşağı səviyyələrinin ziyarət üçün açılmasına imkan verəcək.
"Barselona" hazırda konkret müddətlər təyin etmək istəmir, çünki hər şey şəhər şurasından asılıdır. Lakin qərarın 25 yanvarda planlaşdırılan İspaniya çempionatının 21-ci turunun ev matçı ərəfəsində, yəni "Barselona"nın "Real Ovyedo" ilə qarşılaşmasından əvvəl qəbul ediləcəyi gözlənilir.
"Kamp Nou" 2023-cü ildən bəri təmir altındadır. Tikinti işlərindən sonra "Barselona" ilk dəfə olaraq 22 noyabrda İspaniya çempionatının 13-cü turunun "Atletik Bilbao" ilə matçında öz ev stadionuna qayıdıb.
La Liqanın 18 turundan sonra "Barselona" 46 xalla turnir cədvəlinə başçılıq edir, ikinci yerdə qərarlaşan "Real" isə dörd xal geri qalır.
Almaz Həsənli