FİFA İlin ən yaxşı oyunçuları və məşqçilərininin adlarını açıqladı: Mükafatlandırma mərasimi Dohada keçirildi

Qətərin paytaxtı Dohada FİFA tərəfindən 2025-ci ilin ənyaxşı futbolçularının və məşqçilərinin mükafatlandırma mərasimi keçirilib.

Tədbirdə FİFA tərəfindən təqvim ilinin dünyanın simvolik futbol komandas müəyyənləşdirib.

Komandaya aşağıdakılar daxildir: Canluici Donnarumma (Mançester Siti/PSJ), Aşraf Hakimi (PSJ), Vilyam Paço (PSJ), Virgil van Deyk (Liverpul), Nuno Mendeş (PSJ), Vitinya (PSJ), Pedri (Barselona), Koul Palmer (Çelsi), Cud Bellinqem (Real Madrid), Lamin Yamal (Barselona) və Usman Dembele (PSJ).

PSJ-nin hücumçusu Usman Dembele FİFA-nın 2025-ci ilin ən yaxşı oyunçusu seçilib.

Ötən mövsüm Dembele PSJ-ni liqa tituluna və Fransa Kubokuna, eləcə də Çempionlar Liqasına aparıb və turnirin mövsümün oyunçusu seçilib. 25 qolla hücumçu Fransa liqasının ən çox qol vuran oyunçusu olub. Dembele ötən mövsüm PSJ-də 53 oyun keçirib, 35 qol vurub və 16 məhsuldar ötürmə edib.

PSJ-nin baş məşqçisi Luis Enrike FİFA-nın "Ən Yaxşı" mükafatlandırma mərasimində 2025-ci ilin ən yaxşı məşqçisi seçilib. O, ötən il komandasına Fransa liqasının titulunu, Fransa Kubokunu və Fransa Super Kubokunu, eləcə də Çempionlar Liqasını və UEFA Super Kubokunu qazandırıb. 55 yaşlı ispaniyalı mütəxəssis mükafat uğrunda səsvermədə "Barselona"nın baş məşqçisi Hans-Diter Flik və "Liverpul"un hollandiyalı məşqçisi Arne Slutu geridə qoyub.

"İndependiente"nin hücumçusu Santyaqo Montiel ən gözəl qola görə Ferens Puşkaş mükafatını qazanıb.

May ayında futbolçu Argentina çempionatının 16-cı turunda "İndependiente Rivadavia"ya qarşı oyunda qol vurub. O, cərimə meydançasının xaricindən başından vurduğu zərbə ilə qol vurub. Bu qol "İndependiente"yə 1:0 hesablı qələbə qazandırıb. 25 yaşlı Montiel 2024-cü ildən "İndependiente"də çıxış edir. Bu mövsüm klubun heyətində bütün yarışlarda 36 oyunda yeddi qol vurub və dörd məhsuldar ötürmə edib.

FIFA Ferens Puşkaş mükafatı 2009-cu ildən təqdim olunur. Keçən il qalib argentinalı Alejandro Qarnaço olub.

İtaliyalı Canluici Donnarumma FİFA-nın "İlin Qapıçısı" mükafatına layiq görülüb.

Ötən mövsüm o, "Paris Sen-Jermen"lə Çempionlar Liqasını, Fransa liqasını və Fransa Kubokunu qazanıb. O, Çempionlar Liqasında 17 oyundan 15-də start heyətində meydana çıxıb və altı oyunda qapısını toxunulmaz saxlayıb. Donnarumma turnirin Turnirin Komandasına daxil edilib. O, həmçinin Fransa liqasında 24 oyun keçirib və turnirin ən yaxşı qapıçısı seçilib. Sentyabr ayında o, "Mançester Siti"yə keçib.

Mükafat üçün digər namizədlər arasında braziliyalı Alisson ("Liverpul"), belçikalı Tibo Kurtua ("Real Madrid"), argentinalı Emilian Martinez ("Aston Villa"), almaniyalı Manuel Noyer ("Bavariya"), ispaniyalı David Raya ("Arsenal"), isveçrəli Yann Sommer ("İnter") və polşalı Voyçex Şçesnı ("Barselona") da olub.

2025-ci ildə Donnarumma həmçinin "France Football" jurnalının "İlin Qapıçısı" mükafatını da qazanıb.

Hazırkı "Qızıl top" mükafatının sahibi "Barselona"dan Aitana Bonmati FİFA-nın "İlin qadın oyunçusu" mükafatına layiq görülüb.

İngiltərə milli komandasını ardıcıl ikinci dəfə Avropa çempionluğuna aparan Sarina Viqman qadın futbolunda ən yaxşı məşqçi seçilib. Milli komandası ilə Avropa çempionluğunu və klubu ilə üç ölkə kubokunu qazanan "Çelsi"dən Hanna Hempton ən yaxşı qapıçı seçilib. Ən yaxşı qol üçün "Marta" mükafatı əqrəb zərbəsi ilə qol vuran meksikalı Lisbet Ovalleyə verilib.

Matç zamanı nümunəvi davranışa görə "Ədalətli Oyun" mükafatı "Regensburq"la səfər matçında ev azarkeşinin həyatını xilas edən ikinci liqa Bundesliqa klubu "Maqdeburq"un həkimi Andreas Harlass-Neukinqə təqdim edilib.

Əziz MUSTAFA