Özbəkistan millisinin sabiq baş məşqçisinin köməkçiləri Futbol Assosiasiyasından 350 min avro tələb ediblər

Özbəkistan millisinin baş məşqçisi Sreçko Katanecin üç keçmiş köməkçisi Özbəkistan Futbol Assosiasiyasından (UFA) 350 min avro tələb edirlər. Bu barədə Asia_SportUZ Telegram kanalı məlumat yayıb.

Mənbənin məlumatına görə, sloveniyalı mütəxəssislər Beynəlxalq Futbol Assosiasiyaları Federasiyasının (FİFA) Mübahisələrin Həlli Palatasına şikayət edərək, onların təxminən 350 min avro borcunun olduğunu iddia ediblər.

Sreçko Katanecin üç keçmiş köməkçisinə gənclər komandaları ilə işləmək üçün təklif olunub, lakin onlar müqavilələrinin xüsusi olaraq milli komandanın dünya çempionatına hazırlığı üçün olduğunu izah edərək, bundan imtina ediblər.

Özbəkistan Futbol Assosiasiyası buna cavab olaraq bildirib ki, sabiq baş məşqçinin köməkçiləri ilə müqavilələrindəki “Baş məşqçinin müqaviləsinə xitam verildiyi halda, onun köməkçiləri ilə müqavilələrə eyni vaxtda xitam verilir” bəndinə uyğun olaraq, onların müqavilələri avtomatik olaraq ləğv edilib.

“Tərəflərin qarşılıqlı razılığı ilə baş məşqçi ilə müqaviləyə xitam verilməsi və yeni məşqçi heyətinin gəlməsi əvvəlki mütəxəssis komandası ilə əmək müqaviləsinə xitam verilməsi deməkdir”, - deyə məlumatda bildirilir.

Assosiasiya qeyd edib ki, belə bəndin əmək müqavilələrinə daxil edilməsi FİFA və İdman Arbitraj Məhkəməsinin (CAS) yurisprudensiyasına görə normal təcrübədir.

İdman təşkilatı məşqçilər korpusunun keçmiş üzvlərinə digər yaş qrupları üzrə milli komandalarla işləməyə davam etmək imkanlarının təklif edildiyini, lakin “onlar təklifləri rədd etdiklərini” təsdiqləyib.

Sreçko Katanecin məşqçilər heyətinə Sloveniyadan olan beş mütəxəssis daxil idi: köməkçilər Aleş Çex və Vlado Radmanoviç, fitnes üzrə məşqçi Martin Magister, qapıçılar üzrə məşqçi Nihad Pejkoviç və fizioterapevt Yan Katanec.

Xatırladaq ki, Sreçko Katanec 2021-ci ilin avqustundan Özbəkistan millisinə rəhbərlik edib və 2025-ci ilin yanvarında səhhətində yaranan problemlərlə əlaqədar postunu tərk edib. Milli komandanı Katanecin məşqçilər korpusunun üzvləri ilə birlikdə Özbəkistanı tarixdə ilk dəfə dünya çempionatına aparan Timur Kapadze götürüb.

Oktyabrın 6-da isə 52 yaşlı italiyalı Fabio Kannavaro komandanın baş məşqçisi olub.

Əziz MUSTAFA