İkiqat Olimpiya çempionu Armand Duplantis 13-cü dəfə dünya rekordu qırdı

Çərşənbə axşamı Budapeştdə keçirilən yüngül atletika yarışında isveçli dirəklə hündürlüyə tullanma üzrə idmançı Armand "Mondo" Duplantis 6,29 metr hündürlüyü qət edərək, iyunda müəyyən etdiyi dünya rekordunu növbəti dəfə yeniləyib. Bu barədə Oxuməni.az “World Athletics”-ə istinadən xəbər verir.
Duplantis idmanında mütləq liderdir. 2020-ci ildən bəri o, 13 dünya rekordu qoyub və deyəsən, dayanmağı planlaşdırmır.
İyunun 15-də Stokholmda “uçan isveçli” 6,28 metrlik barını adlaya bilib. Çərşənbə axşamı, avqustun 12-də Budapeştdə o, ikinci cəhdində 6,29 metr hündürlüyü götürə bilib. İkiqat Olimpiya çempionu karyerasında 13-cü, bu il isə üçüncü dəfə dünya rekordunu yenidən yazdı.
İyulun 21-də başa çatan Monako turnirindən sonra Duplantis üç həftəlik fasilə verib və onsuz da mübahisəsiz kimi görünən mövqeyini qorumaq üçün Macarıstandakı turnirə optimal formada yaxınlaşıb.
Mondo çıxışına 5,62 metr hündürlüklə başlayıb, daha sonra 5,82, 6,02, 6,11 metr və nəhayət, 6,29 metr hündürlüklə rekorda imza atıb.
İkinci yeri 6,02 metr nəticə ilə yunan tullanan Emmanuil Karalis, 5,82 metr nəticə ilə avstraliyalı Kertis Marşal üçüncü, 5,72 metr hündürlüklə fransalı Tibo Kolle isə dördüncü yerdə başa vurub.
Almaz Həsənli