Qəzadan sağ qurtaran Rəşad Dağlı: "Nə içkili olmuşam, nə də başqa bir şey"

Xəbər verdiyimiz kimi, tanınmış meyxanaçı Rəşad Dağlı Hacıqabula dəvət aldığı toy məclisindən qayıtdıqdan sonra dəhşətli avtomobil qəzasına düşüb. Onu və yanında olan Nicat adlı sərnişini təcili olaraq Hacıqabul xəstəxanasına çatdırıblar və yaralılara dərhal tibbi yardım göstərilib.

Meyxanaçının qolunda sınıq olduğundan gipsə qoyulub. Burnunda, qabırğalarında yaralar əmələ gəlib.

Hazırda Rəşad Dağlı Bakıya gətirilib və o, yenidən həkim müayinəsindən keçdikdən sonra evə buraxılıb. Vəziyyəti stabildir. Buna baxmayaraq, bir-iki gün yataqda qalmağı məsləhət görülüb.

Hadisə ilə bağlı əlavə məlumatlar əldə etməkdən ötrü meyxanaçı ilə əlaqə saxladıq:

- Yastığın yüngül olsun. Hadisə necə baş verdi?

- Vallah. Heç özüm də bilmədim. Toydan çıxmışdıq. İsrarla qalmağımızı təkid etdilər, amma yorğun-arğın olduğumuzdan Bakıya qayıtmağı məsləhət bildik. Şükür Allaha ki, o cür dəhşətli qəzadan sonra sağ-salamat qaldıq. Bu, bir möcüzədir. Allahın möcüzəsi! Dəhşət içində idim. Sanki hansısa qüvvə bizi qorudu.

- Şayiə gəzir ki, içkili olmusuz...

- Mən oruc tutmuşam. Bir də, əgər içkili olsaydım, bunu polis də müəyyənləşdirərdi və ya qardaşıma verərdim maşını o sürərdi. Ağamalı qardaşım mənim köməkçimdir. O, qabaqdakı dostların maşınında idi. Biz isə Nicatla arxadan gəlirdik. Toydan gecəyarısı çıxmışdıq. Həm yuxulu idik, həm də yorğun. Mən toylara çörəkpulu arxasınca gedirəm, kefə-damağa yox. Evdə məni iki övladım gözləyir. Nə içkili olmuşam, nə də başqa şey. Necə deyərlər, kişinin başına iş gələr. Hadisədir də... Allahıma şükürlər olsun. Bu Ramazan ayında məni qorudu.

- Hər şey qaydasındadırmı?

- Bəli. Qolum sınıb, burnumun əti parçalanıb, qabırğalarımda bəzi sınıqlar var, ayaqlarım cızılıb. Demək olar ki, hər şey qaydasındadır. (gülür) Ancaq bu günümə də şükür.

Xatırladaq ki, Rəşad Dağlı bu gün səhər saatlarında Bakı-Qazax yolunun Hacıqabul şəhəri ərazisində yol qəzasına düşüb. Belə ki, "Toyota Prado" markalı "10 KC 011" dövlət nömrə nişanlı avtomobil beton dirəyə çırpılaraq aşıb.

Nəticədə meyxana ustası 1984-cü il təvəllüdlü Əmirov Rəşad Vaqif oğlu (Rəşad Dağlı) və Bülbülə sakini, 1985-ci il təvəllüdlü Hüseynov Nicat Adil oğlu müxtəlif dərəcəli xəsarətlərlə Şirvan şəhər xəstəxanasına yerləşdiriliblər. Onu da vurğulayaq ki, Hüseynov Nicat tanınmış meyxanaçı Pərviz Bülbülənin qaynıdır.

Hazırladı: Könül AYPARA