İlhamə Quliyevanın oğlu Aygünü xəstəxanadan qovub?

Ötən gün "Axar.az" saytı sensasiya yaratmaq, oxucu sayını artırmaq məqsədilə xalq artistləri İlhamə Quliyeva və Aygün Kazımova barədə həqiqətəuyğun olmayan məlumat yayıb. Xəbərdə deyilir ki, guya Aygün Kazımova Mərkəzi Neftçilər Xəstəxanasında İlhamə Quliyevanı ziyarət edərkən qalmaqalla üzləşib. "Axar.az"ın əldə etdiyi məlumata görə, dekabrın 10-da, axşam saat 21:15-də müğənni Aygün Kazımova yaxın ətrafı ilə Mərkəzi Neftçilər Xəstəxanasında müayinədə olan Xalq artisti İlhamə Quliyevanı ziyarətə gəlib. Şahidlərin sözlərinə görə, mühafizəçi İlhamə Quliyevanın oğlu Orxan Nadirova Aygün Kazımovanın gəlişini xəbər verib. Orxan Nadirov isə ziyarəti mümkünsüz hesab edərək anasının dincəldiyini bildirib. Bu sözlərdən sonra mühafizəçi Aygün Kazımovanı İlhamə Quliyevanın olduğu palataya buraxmayıb. Palataya buraxılmamasını özünə qarşı təhqir hesab edən Aygün Kazımova mühafizəçi ilə sərt şəkildə mübahisə edərək xəstəxananı tərk edib. Məsələyə Azərbaycanın və Dağıstanın xalq artisti, Şöhrət və Şərəf ordenli İlhamə xanım Quliyevanın mətbuat katibi Faiq Ələkbərli münasibət bildirib. "Yalan, heç bir mənbəyə söykənməyən bu xəbəri hazırlayan jurnalistin peşəkarlığına şübhə etməmək olmur. Öncə onu qeyd edim ki, Azərbaycanın və Dağıstanın xalq artisti, Şöhrət və Şərəf ordenli İlhamə xanım Quliyeva bu saytı heç vaxt oxumayıb, bundan sonra da oxumaq fikrində deyil. İkincisi, belə bir hadisə baş verməyib, sayt dezinformasiya dərc edib. KİV qaydalarına görə, jurnalist qeyri-müəyyən mənbədən xəbəri eşidibsə, onu dəqiqləşdirmək üçün ya sənətkarla, ya da mətbuat katibi ilə əlaqə saxlamalı idi. Lakin qeyri-peşəkarlıq burda da özünü göstərir. Biz kiməsə və ya hansısa dırnaqarası sayta hesabat vermək məcburiyyətində deyilik. Ancaq oxuculara hörmət edərək, nəzərinizə çatdırırıq ki, həmin gün Respublikanın xalq artistləri Aygün Kazımova, Faiq Ağayev, əməkdar artist Cavanşir Məmmədov, müğənni Ayan Babakişiyeva, prodüser Tarix Əliyev (Tolik), opera ifaçısı Ülvi Qılınc və başqa şəxslər olub. Belə bir halın yaşanmasını dəqiqləşdirməkdən ötrü adları çəkilən şəxslərdən də soruşa bilərsiz. İlhamə xanıma baş çəkməyə gələn xalq artistləri Aygün Kazımova ilə Faiq Ağayevi şəxsən özüm qarşılamışam. Və belə bir halın yaşanması düzgün deyil. Ümumiyyətlə, sənətkar qapıya gələn düşməninə də bu cür hərəkəti etməz. Əgər "Axar.az" saytına reklam lazımdırsa, düzgün və operativ xəbərlər yazmaqla oxucularınızın sayını artıra bilər".