Ürək xəstəlikləri riskini azaldan bir vərdiş aşkarlandı
Mütəmadi yuxu cədvəlinə riayət etmək ürək-damar xəstəlikləri riskinin azalması ilə əlaqələndirilir.
Oxuməni.az xəbər verir ki, bu, Harvard Tibb Məktəbi və Boston Uşaq Xəstəxanasının alimlərinin gəldiyi nəticədir və onların tədqiqat nəticələri Amerika Ürək Assosiasiyasının (AHA) konfransında təqdim olunub.
Tədqiqatçılar 10.362 yetkin arasında bir milyondan çox gecə yuxusunun məlumatlarını təhlil ediblər. İştirakçılar yuxularının müddətini, keyfiyyətini və müntəzəmliyini izləyən cihazlar taxıblar. Daha sonra onların sağlamlıqları orta hesabla 3,7 il ərzində izlənilib.
Məlum olub ki, qeyri-müntəzəm yuxu və oyanma vaxtları ürək tutması, insult və ürək çatışmazlığı da daxil olmaqla ciddi ürək-damar ağırlaşmaları riskini 20-23 faiz artırır.
Bundan əlavə, gecədən gecəyə yuxu müddətinin hər əlavə 29 dəqiqəsi ürək-damar ağırlaşmaları riskini 24 faiz, ürək çatışmazlığı riskini isə 20 faiz artırır.
Tədqiqatçılar həmçinin daha tam yuxu dövrlərinin ürək ritminin pozulması riskini 28 faiz azaltdığını aşkar ediblər. Bununla belə, qeyri-adi dərəcədə uzun yuxu dövrləri ürək tutması və ya insult riskini 55 faiz artırıb.
Müəlliflər hesab edirlər ki, yatmaq və həftəsonları da daxil olmaqla, təxminən eyni vaxtda oyanmaq vərdişi ürək üçün faydalı ola bilər. Lakin, tədqiqat qeyri-müntəzəm yuxu rejimlərinin ürək-damar xəstəliklərinə səbəb olduğunu sübut etmir.
Əvvəllər bildirilirdi ki, gündüz yuxuları demans riskinin əlaməti ola bilər.
Əziz MUSTAFA
