İngiltərədə 20-yə qədər doğum şöbəsi bağlana bilər

İngiltərədə həkim çatışmazlığı və qeysəriyyə əməliyyatlarının artması səbəbindən 20-yə qədər Milli Səhiyyə Xidmətinin doğum şöbəsi bağlana və ya rolları dəyişdirilə bilər. Oxuməni.az xəbər verir ki, bu barədə The Guardian qəzeti NHS Alyansının təcili yardım xidmətlərinin direktoru Metyu Hopkinsə istinadən məlumat yayıb.

Hopkinsin sözlərinə görə, İngiltərədəki 155 məsləhətçi mama-ginekoloqun rəhbərlik etdiyi doğum şöbəsindən 20-yə qədəri bağlana və ya formatını dəyişə bilər. O, analar və yeni doğulmuş körpələr üçün daha təhlükəsiz və daha davamlı qayğı təmin etmək üçün doğum xidmətinin daha az xəstəxanada cəmləşməsini qaçılmaz adlandırıb.

O, ildə 1500 ilə 2000 arasında doğuş həyata keçirən daha kiçik şöbələri ən həssas hesab edir. Bu müəssisələr mama-ginekoloq çatışmazlığı ilə üzləşir və qeysəriyyə əməliyyatlarının yayılması daha çox işçi heyəti və əməliyyat otaqları tələb edir. Bağlanmaq təhlükəsi ilə üzləşən bölmələrin çoxu səhiyyə işçilərinin işə götürülməsinin xüsusilə çətin olduğu kənd və ya sahil ərazilərində yerləşir.

Kral Mama Kollecinin baş siyasət direktoru Hanna Leonard qadınların və ailələrin yerli doğum şöbələrindən asılı olduğunu, buna görə də yüksək keyfiyyətli tibbi yardımın evə yaxın yerdə mövcud olmalı olduğunu bildirdi. Kral Mama və Ginekoloq Kollecinin prezidenti Alison Rayt qeyd etdi ki, bölmələri bağlamazdan əvvəl kadr problemlərinin həlli üçün digər yollar nəzərdən keçirilməlidir.

Barnstaple-dəki Şimali Devon Rayon Xəstəxanasındakı doğum şöbəsi avqust ayında işçi çatışmazlığı səbəbindən müvəqqəti olaraq bağlanmışdı. Kral Devon Universiteti Səhiyyə Fondu təhlükəsiz şəkildə yenidən açılması üçün kifayət qədər həkimin olub-olmadığını müəyyən etməli idi. Barnstaple-dən 43 mil məsafədə yerləşən Ekseterdə təxminən 194 qadın doğum edib; bağlanma səbəbindən yol təxminən 70 dəqiqə çəkir.

Oksford Universitetinin professoru Marian Nayt əvvəllər doğum şöbələrinin birləşdirilməsinə çağırırdı. Onun məlumatlarına görə, İngiltərədə qeysəriyyə əməliyyatı nisbəti 2020-ci ildəki doğuşların 33%-dən keçən il 45%-ə yüksəlib. MBRRACE-UK hesabatında qeyd olunur ki, 2022-2024-cü illərdə doğuş zamanı ölən bəzi qadınlar mama-ginekologiya cərrahının və ya əməliyyat otağının olmaması səbəbindən qeysəriyyə əməliyyatlarının gecikməsi və ya təxirə salınması ilə üzləşiblər.

Əziz Mustafa