ABŞ-da mədəaltı vəzi xərçənginə qarşı inqilabi dərman təsdiqlənib

ABŞ Qida və Dərman Administrasiyası (FDA) Revolution Medicines şirkətinin hazırladığı dərmanı sürətləndirilmiş qaydada təsdiqləyib. Oxuməni.az xəbər verir ki, bu barədə “The New York Times” məlumat yayıb.

Rasonque (daraxonrasib) preparatının 300 mq dozada istifadəsi əvvəllər ən azı bir kurs sistemli müalicə almış metastatik adenokarsinomalı yetkin xəstələr üçün nəzərdə tutulub. Dərmanın təyin edilməsi üçün əvvəlcədən mutasiyaların mövcudluğuna dair diaqnostik testlərin aparılması tələb olunmur.

Gündəlik qəbul üçün nəzərdə tutulan tablet şəklindəki preparat yeni inhibitorlar sinfinə aiddir və bədxassəli hüceyrələrin böyüməsinə səbəb olan mutasiyaya uğramış RAS zülalını zərərsizləşdirir. Molekulun spesifik quruluşuna görə bu amil əvvəllər müalicəsi mümkün olmayan hədəf hesab edilirdi.

500 nəfərin iştirakı ilə keçirilən Phase 3 RASolute 302 klinik tədqiqatının nəticələrinə görə, Rasonque ölüm riskini 60 faiz azaldıb. Kimyaterapiya ilə müqayisədə ümumi sağqalmanın median müddəti 6,7 aydan 13,2 aya yüksəlib.

Xəstəliyin proqressivləşmədən keçən sağqalma müddəti də iki dəfə artaraq 3,6 aydan 7,2 aya çatıb. Bundan əlavə, preparat ağrı sindromunun güclənməsini və xəstələrin həyat keyfiyyətinin ümumi pisləşməsini iki dəfədən çox gecikdirib.

Müalicənin bir aylıq kursunun qiyməti 39 800 dollar olaraq müəyyən edilib. Bu molekulyar təsir texnologiyası artıq ağciyər xərçənginə qarşı mübarizədə istifadə üçün də uyğunlaşdırılır.

Almaz Həsənli