![ATƏT-in Minsk qrupunun həmsədrləri birgə bəyanat verdilər](/assets/images/white.jpg)
ATƏT-in Minsk qrupunun həmsədrləri birgə bəyanat verdilər
ATƏT-in Minsk qrupunun həmsədrləri regiona son səfərlərinin yekununa dair bəyanatla çıxış ediblər. Bəyanatda bildirilir ki, martın 2-dən 6-dək ATƏT-in Minsk qrupunun həmsədrləri Robert Bradtke (ABŞ), İqor Popov (Rusiya), Jak For (Fransa) və ATƏT fəaliyyətdə olan sədrinin xüsusi nümayəndəsi Anjey Kaspşik İrəvan, Dağlıq Qarabağ və Bakıda səfərdə olublar. Həmsədrlər prezidentlər S.Sarkisyan və İ.Əliyevlə, Dağlıq Qarabağın de-fakto rəhbərliyi ilə görüşüblər.
Həmsədrlər tərəflərə yanvarın 23-də Soçidə prezidentlər
Medvedev, Əliyev və Sarkisyanın verdiyi birgə bəyanatın həyata keçirilməsi
ilə bağlı plan təqdim ediblər. İki ölkə prezidentinin baza prinsipləri üzrə
razılaşmanın əldə olunmasını tezləşdirməyə hazır olduğuna əsaslanaraq, həmsədrlər
tərəflərə geniş sülh sazişi üzərində işin davam etdirilməsi ilə bağlı təkliflərini
veriblər.
Həmsədrlər həmçinin tərəflərlə cəbhə bölgəsindəki
insidentlərin araşdırılması mexanizmi üzərində işi davam etdirməklə bağlı Soçi
bəyanatındakı öhdəliklərin yerinə yetirilməsini müzakirə ediblər. Bundan əlavə,
həmsədrlər humanitar və xalqlar arasında əlaqələri müzakirə ediblər, qeyd ediblər
ki, bu əlaqələr sülh prosesinin ziyanına siyasiləşdirilməməli, regiondakı
xalqlar arasında qarşılıqlı anlaşmanın əldə olunmasına xidmət etməlidir.
Həmsədrlər ATƏT Daimi Şurasını münaqişənin sülh yolu ilə həlli
istiqamətində atılmış son addımlarla bağlı məlumatlandırmaq üçün martın 22-də
Vyanaya səfər edəcəklər.
O.M.