Türkdilli ölkələr Rusiyanın imperiya maraqlarına qarşı

Türkdilli ölkələr Rusiyanın imperiya maraqlarına qarşı

20 Oktyabr 2011 11:58
Bəyəndim (0) Bəyənmədim (0)
Azərbaycan və Qazaxıstan prezidentləri təkbətək görüşüblər

Qazaxıstanda rəsmi səfərdə olan Azərbaycan prezidenti İlham Əliyev ilə Qazaxıstan prezidenti Nursultan Nazarbayev arasında təkbətək görüş keçirilib. Görüşdə ikitərəfli və regional məsələlər, Azərbaycanla Qazaxıstan arasında münasibətlərin perspektivləri və qarşılıqlı maraq doğuran digər məsələlər müzakirə olunub. Həmçinin Türkdilli ölkələrin Əməkdaşlıq Şurasının Qazaxıstanın Almatı şəhərində keçirilən zirvə toplantısında Türkdilli Ölkələrin İş Şurasının yaradılması məsələsinin detallarına toxunulub.

"RİA Novosti" xəbər agentliyinin məlumatına görə, İş Şurasına türkdilli ölkələrin iri şirkətləri və təşkilatları daxil olacaq. Artıq Qazaxıstan, Azərbaycan, Qırğızıstan və Türkiyənin hökumət nümayəndələrinin iştirakı ilə Şuranın ilk iclası da keçirilib. İclasda iqtisadi əməkdaşlığın aktual məsələləri və perspektivi müzakirə olunub. Bundan başqa, toplantı çərçivəsində 4 ölkənin işgüzar dairələrinin görüş və danışıqları keçirilib.
Türkdilli ölkələrin Əməkdaşlıq Şurasının baş katibi Xəlil Akıncı bildirib ki, İş Şurasının qarşısında 2 əsas vəzifə var - yeni əməkdaşlıq istiqamətlərinin axtarışı və qarşılıqlı iqtisadi-ticarət əlaqələrində yaranan əngəllərin aradan qaldırılması: "Mən bilirəm ki, sahibkarlar gömrük proseduralarından şikayət edirlər. Ticarət əlaqələrində gömrük məsələsi böyük rol oynayır".
Sərhədləri keçmək və tranzit sənədləri almaq sahəsində problemlər olduğunu vurğulayan X. Akıncı bu problemlərin həlli üçün İş Şurası çərçivəsində nəqliyyat və rabitə agentliyinin yaradılmasını məqsədəuyğun sayıb.
Qeyd edək ki, Türkiyənin baş naziri Rəcəb Tayyib Ərdoğan türkdilli ölkələrin dövlət başçılarının Almatı sammitinə qatılmayacaq. O, son terror hücumları ilə əlaqədar səfərini ləğv edib. Türkiyəni baş nazirin müavini Bəkir Bozdağ təmsil edəcək. Toplantını yekunları əsasında Almatı Bəyannaməsi imzalanacaq.
"Türkdilli ölkələr Rusiyanın prezidenti seçiləcək Putinin Avrasiya İttifaqı yaratmaq fikrinə alternativ təqdim edirlər. Bununla da Rusiyanın imperiya maraqlarının qarşısını almaq istəyirlər", - deyə Türkiyənin "Vatan" qəzeti məsələyə aydınlıq gətirir.

Ulu öndər M.K. Atatürk demişkən: "Türkün türkdən başqa dostu yoxdur".

Sərvər Aslanov

O.M.