Şamo: “Hətta yalvarsalar da müdafiə naziri olmaram?”

Şamo: “Hətta yalvarsalar da müdafiə naziri olmaram?”

9 İyun 2016 14:27
Bəyəndim (0) Bəyənmədim (0)

Qarabağda qondarma "müdafiə naziri" general Levon Mnatsakanyanın adamlarının onun yerini tutmaq istəyən keçmiş "müdafiə naziri Samvel Babayanın tərəfdaşı, "deputat" Ayk Xanumyanı şil-küt etməsindən sonra siyasi gərginlik artır.

Virtualaz.org erməni mənbələrinə istinadən xəbər verir ki, burnu, çənəsi və qabırğaları sındırılan Xanumyan onu döyənlərin "mülki şəxslər" olduğu haqda yayılan xəbərləri təkzib edib.

"Azadlıq" radiosunun erməni xidmətinin məlumatına görə Xanumyan iyunun 6-da səhər Xankəndində "parlamentin" binasından çıxanda hərbi uniformalı 7-8 nəfər ona yaxınlaşıb, döyərək avtomobilə oturdub və Əsgəran rayonunun Xanyurdu kəndinə (ermənilər bu kəndi Xnatsax adlandırır) aparıblar. Orada onu 20-yə yaxın şəxs döyməyə, təhqir etməyə başlayıb. Xanumyanı döyənlər onun videosunu çəkiblər və məcbur ediblər ki, iyunun 5-də Samvel Babayanın Qarabağa qayıtdığı gün Xankəndində təşkil etdiyi aksiyanın "təxribat" olduğunu, bu aksiyanın keçmiş "müdafiə naziri" tərəfindən maliyyələşdirildiyini etiraf etsin.

Xanumyan deyir ki, o, həmin deyilənləri kamera qarşısında təkrarlamağa məcbur olub. "Bu videokadrlar yayılsa mən bəribaşdan bəyan edirəm ki, onun heç bir qüvvəsi yoxdur, çünki təhdid altında danışmışam"- o deyib.

Xatırladaq ki, həmin aksiyada Xanumyan Samvel Babayanın yenidən müdafiə naziri təyin olunmasını tələb etmişdi. Babayan aprel döyüşlərindən sonra Rusiyadan Ermənistana qayıdıb və Ermənistan hakimiyyətinin, habelə qondarma Qarabağ rejiminin hərbi siyasətini sərt tənqid edib. O, deyib ki, Azərbaycan ordusu cəmi yarım saata-bir saata ermənilərin müdafiə mövqelərini ələ keçirib.

Tərəfdarının döyülməsinə münasibət bildirən Babayan bildirib ki, Ayk Xanumyan onun müdafiə naziri təyin edilməsinə çağırmaqla üzərinə çox yük götürüb. "Hətta yalvarsalar da müdafiə naziri olmaram. Mən dünən də demişəm, bu gün də deyirəm ki, müdafiə naziri olmaq istəmirəm. İndi nə edim? Mən də onları döyüm? Mənim cavabım necə olmalıdır ki?" - Babayan deyib.

Xanumyanın arvadı Diana Movsisyan isə deyir ki, ərinin döyülməsinə görə bütün məsuliyyət "prezident" Bako Saakyanın üzərinə düşür və bu siyasi sifarişli cinayətdir.

Daşnaksütun erməni inqilabi federasiyası isə Qarabağda keçmiş və indiki "müdafiə nazirləri" arasında qarşıdurmanın qızışmasından narahat olaraq "ittihamları dayandırmağa" çağırıb. Ermənistan mətbuatı isə yazır ki, Babayan hələ Qarabağdadır, ancaq telefonlara cavab vermir. Bildirilir ki, Ermənistan hakimiyyətinin onu neytrallaşdırmaq üçün planı var: Babayan çox adama borcludur və hakimiyyət onun borclularının siyahısını tutur. Həmin şəxslərdən tələb edəcəklər ki, Babayandan pulları geri istəsinlər. "Joqovurd" qəzetinin yazdığına görə hakimiyyət əmindir ki, bu halda Babayan Ermənistanı və Qarabağı tərk etməsə belə siyasi fəaliyyətinə son qoyub xəlvətə çəkiləcək.

Mediainfo.az