Dörd türk nazirinin istefa xəbəri yalan çıxdı

Türkiyənin hakim Ədalət və İnkişaf Partiyasının sədr müavini Hüseyn Çelik 4 nazirin istefa ərizəsini yazdığı və Baş nazir Rəcəb Tayyib Ərdoğanın da istefaları qəbul etdiyi barədə məlumatları təkzib edib. Yerli telekanallardan birində jurnalistlərin suallarını cavablandıran Hüseyn Çelik bildirib ki, oğulları korrupsiya istintaqı çərçivəsində saxlanılan nazirlər də daxil olmaqla 4 nazirin istefa ərizəsi yazması barədə xəbərlər həqiqətə uyğun deyil.

Hüseyn Çelik korrupsiya əməliyyat barədə Baş nazir Ərdoğanın da televiziyadan xəbər tutmasını doğru hesab etmədiyini də vurğulayıb. "Türkiyədə ilk dəfə baş polis idarəsinin rəisi və valinin xəbəri olmadan əməliyyat həyata keçirilməsinə şahid oluruq. Bu cür böyük miqyasda bir əməliyyat keçirilir və ölkənin Baş naziri, daxili işlər naziri bunu televiziyadan öyrənir. Əməliyyatın yanlış tərəfi xəbərdar edilməli olan şəxslərin, Baş nazirin xəbərdar edilməməsidir".

Xatırladaq ki, Türkiyədə rüşvətxorluq və korrupsiyaya qarşı əməliyyat çərvivəsində saxlanılanlar arasında 3 nazirin oğulları da var. Əməliyyat İstanbul baş polis idarəsinin rəisi Hüseyn Çapkının da xəbəri olmadan həyata keçirilib. Bununla əlaqədar Çapkın vəzifəsindən uzaqlaşdırılıb.