Dağlıq Qarabağ haqda nəşr olunan kitabda böyük yanlışlıq

Təbriz Universitetinin təşkilatçılığı ilə Aran Beynəlxalq Mədəniyyət və Araşdırmalar Mərkəzində "İslam dünyası və Qarabağ" adlı elmi-praktiki konfrans keçirilib. Qarabağ Azadlıq Təşkilatından ANS PRESS-ə verilən məlumata görə, konfransda Təbriz Universitetinin rəhbərliyi "Beynəlxalq Qarabağ konfransı. Məqalələrin tezisləri" adlı kitabın təqdimatı olub. Azərbaycan və fars dillərində hazırlanmış kitaba İran və Azərbaycandan olan müəlliflərin əsərləri daxil edilib.

Maraqlıdır ki, kitabın üz səhifəsindəki şəkildə Dağlıq Qarabağ Azərbaycandan ayrı təsvir olunub. Daha doğrusu Azərbaycan, İran və Ermənistan əraziləri eyni rəng - göy fonda təsvir edildiyi halda, Dağlıq Qarabağ narıncı fonda verilib.
Konfransda iştirak edən QAT sədri Akif Nağının ANS PRESS-ə verdiyi açıqlamada sözügedən kitabın üz qabığındakı şəkildə hər hansı bir qərəz görmədiyini deməklə yanaşı, bunu texniki səhvlə izah etməyə çalışdı: "Təbriz şəhərində olduğumuz 4 günlük səfərdə çoxsaylı konfrans, görüş və digər tədbirlər keçirdik. Orada hər hansı bir qərəz müşahidə etmədik. Kitabda Dağlıq Qarabağ həqiqətləri, erməni işğalı əksini tapıb. Konfransda Dağlıq Qarabağa həsr olunduğundan, üz şəkili bu formada veriblər. Gələn konfranslarda biz bu məsələni onların diqqətinə çatdırarıq".
Qeyd edək ki, Akif Nağı ilə yanaşı Qarabağ Uğrunda İslami Müqavimət Hərəkatının sədri Rövşən Əhmədli həmin konfransda iştirak edib.