Politoloq Qabil Hüseynli: "Mirzoyanın sözlərinin cavabı müharibədir"
Ermənistan xarici işlər naziri Ararat Mirzoyanın Rusiyanın RİA xəbər agentliyinə müsahibəsində ölkəsinin bu günədək sərgilədiyi ənənəvi beynəlxalq hüquqa zidd və Azərbaycana qarşı ərazi iddialarını əks etdirən mövqeyi rəsmi Bakıya əsas verir ki, Ermənistana qarşı daha adekvat addımlar atsın, hətta sülhə məcburetmə əməliyyatı ilə bağlı xəbərdarlıqlar etsin.
Oxuməni.az-ın verdiyi xəbərə görə, bu sözləri politoloq Qabil Hüseynli Ermənistan xarici işlər naziri Ararat Mirzoyanın RİA agentliyinə müsahibəsini şərh edərkən axar.az-a açıqlamasında deyib.
Onun sözlərinə görə, məğlub bir ölkənin xarici işlər naziri kimi Ararat Mirzoyanın beynəlxalq hüquqa zidd və Azərbaycana qarşı ərazi iddialarını əks etdirən mövqe sərgiləməsi olduqca gülüncdür:
“Sual yaranır: 10 noyabr bəyanatı nədir? Mirzoyan anlayırmı ki, bu, Ermənistanın Rusiyanın şahidliyi ilə imzaladığı kapitulyasiya aktıdır?
Bu bəyanatı Ermənistan Baş naziri Nikol Paşinyan imzalayıb. Onun imzası erməni xalqının iradəsidir. Özü də o erməni xalqı ki, Paşinyanı inqilabla hakimiyyətə gətirib, 44 günlük müharibədə məğlub olmasına baxmayaraq, yenidən seçkilərdə qalib edib. Mirzoyanın bütün bunlara baxmayaraq bu gün yenə Azərbaycana qarşı ərazi iddiaları ilə çıxış etməsi ondan xəbər verir ki, bu şəxs ya Baş nazir Nikol Paşinyanın hakimiyyətini, siyasi iradəsini tanımır, ya da rəsmi İrəvan yeni bir müharibənin arzusundadır”.
Politoloqun sözlərinə görə, lazım gələrsə, Ermənistanı sülhə məcburetmə əməliyyatlarına başlaya bilərik:
“Ölkəmiz dəfələrlə beynəlxalq hüquq prinsipləri əsasında Ermənistanla münasibətləri normallaşdırmaq tərəfdarı olduğunu bəyan edib. Ermənistan tərəfinin revanşist bəyanat və davranışları isə bu ölkənin hələ də beynəlxalq hüququ tanımadığını sübut edir. Belə ölkə ilə münasibətlərin normallaşdırmaq olar?
Müharibə bir ölkənin ən son əl atmalı olduğu vasitədir. Lakin qarşı tərəf də sülhdən, dialoqdan anlamırsa, edilə biləcək başqa şey yoxdur. Rəsmi İrəvan bu cür əsassız iddialarla çıxış etməyə davam etsə, Azərbaycana qarşı ərazi iddialarından imtina etməsə, veriləcək cavab müharibədir”.
