Ermənistanın Müdafiə naziri erməni cəmiyyətini təhqir etdi

Dünən İrəvanda Ermənistan Müdafiə naziri, Elm və Təhsil naziri, Gənclər və İdman naziri, Fövqəladə Hallar naziri və Respublikanın polis rəisi arasında məşvərət xarakterli görüş keçirildi. Tədbirdə gənclərin hərbi vətənpərvərlik və əsgərliyə çağırış mövzularına toxunuldu. Ermənistanın "AR" televiziya kanalının "Azdarar" verilişinə istinadən Tert.am saytı məlumat verir ki, Müdafiə naziri Seyran Ohanyan həmkarlarına nisbətən radikal danışdı: ""Cəmiyyət necədirsə, ordu da elədir" fikri indən belə bizim üçün qəbuledilməzdir. Biz cəmiyyətdən fərqlənməyə çalışacağıq ki, ona nümunə olaq, onu arxamızca aparaq, bununla da cəmiyyətdə mövcud olan bütün mənfi halları aradan qaldıraq".

Nazirin bu fikri erməni cəmiyyətində birmənalı qarşılanmadı. Əsasən mətbuat orqanları onun sözlərini tənqid atəşinə tutdular. Belə ki, nazir çıxışı zamanı ordunun inkişaf etməli olduğu fikrini aşılamağa çalışsa da, əslində yaşadığı cəmiyyəti təhqir edirdi. Bir növ Ermənistan cəmiyyətindən utandığını dilə gətirirdi.

Ermənistan ordusu erməni cəmiyyətinə nümunə olsa, Ermənistan dedovşina qaydaları ilə idarə olunacaq, yəni məzlum xalq hər gün naryada göndəriləcək...

Fuad Borçalı

O.M.