Azərbaycan "Zəngəzur" elektrikötürücü xəttinin tikintisinə başlayıb

"Azərenerji" şirkəti Cəbrayıldan Aqbəndə qədər 330 kV gərginlikli və 1000 MVt gücündə iki zolaqlı "Zəngəzur" yüksəkgərginlikli elektrikötürücü xəttinin (EÖX) tikintisinə başladığını bildirib.
Oxuməni.az “Trend”-ə istinadla məlumatına görə, 74 km uzunluğunda olan EÖX ilə paralel olaraq, Naxçıvandan Ordubad sərhədinə qədər uzanacaq 105 km uzunluğunda başqa bir xətt də tikilir.
EÖX Araz çayı boyunca, bəzi hissələrdə isə çox mürəkkəb təbii relyef şəraitində dağlıq və qayalıq massivlər vasitəsilə keçəcək.
Sonra Zəngəzur dəhlizi vasitəsilə 44 km uzunluğunda EÖX tikiləcək və bu xətt Aqbənd və Ordubad xətlərinə qoşulacaq.
Naxçıvanda tikiləcək yarımstansiya 330 kV gərginliyi 400 kV-a çevirəcək. Bu gərginlik Azərbaycan-Türkiyə-Avropa enerji dəhlizi çərçivəsində tikiləcək Naxçıvan-Türkiyə EÖX-ə işçi gərginlik kimi veriləcək.
Bu, energetiklərin Naxçıvan Muxtar Respublikasını ölkənin vahid enerji sisteminə tam inteqrasiya etməklə yanaşı, Avropa enerji bazarlarına çıxışını da təmin etməyə imkan verəcək. Layihə artıq Azərbaycan tarixində ən böyük layihə adlandırılıb.

Oxuməni.az