5 gündür ki, Putinin Qarabağdakı “sülhməramlı”larından xəbər yoxdur…

"Rusiya hərbi kontingentinin Qarabağdakı torpaqlarımızda nə iş gördüyü bəlli deyil..."

Rusiya ordusunun Ukraynaya təcavüzü başlayan günlərdən ölkə Müdafiə Nazirliyinin rəsmi saytında Azərbaycandakı sülhməramlı(?) kontingentin fəaliyyətinə aid bölmədə problemlər yaranıb.

Oxuməni.az-ın verdiyi xəbərə görə Moderator.az əməkdaşının bu gün apardığı araşdırmadan bəlli olub ki, Rusiya MN-in saytının Qarabağdakı “sülhməramlı”lara aid bölməsi açılsa da, bölmənin əsas altbölümləri, o cümlədən “Xəbərlər” və hərbi kontingentin məsuliyyət zonasındakı gündəlik fəaliyyətini əks etdirən xəritələrlə bağlı “infoqrafika” bölümü çalışmır.

Səhv etmiriksə, “sülhməramlı”lara aid sonuncu yeni xəbərə fevralın 24-də, yəni Ukraynada savaş başlayan gün rast gəlmişik. O gündən sonra isə xəbərlər yenilənməyib... Yəni Rusiya hərbi kontingentinin Qarabağdakı torpaqlarımızda nə iş gördüyü bəlli deyil...

Onu da qeyd edək ki, bu günədək Rusiya MN saytının baş səhifəsindəki xəbərlərdə Ukraynadakı hərbi əməliyyatlara dair bir cümlə də yoxdur. Sanki Ukraynaya təcavüz edən Rusiya ordusu deyil…