Qədim Roma İmperiyasına aid qızıl sikkələr tapılıb

10 Sentyabr 2018 09:33

Bəyəndim (0) Bəyənmədim (0)

İtaliyanın şimalındakı Komo şəhəri yaxınlığında, köhnə bir teatrın ərazisində Qədim Roma imperiyası dövrünə aid olan yüzlərlə qızıl sikkələr tapılıb.

Bu barədə ölkənin Mədəniyyət Nazirliyi məlumat yayıb.

Məlumata əsasən, Roma imperiyasının son dövrlərinə (bizim eranın V əsrinə) aid olduğu güman edilən qızıl sikkələr "Cressoni" teatrının zirzəmisində unikal formalı steatit qabda aşkar edilib. Yerli KİV-lər sikkələrin milyonlarla avro dəyərində olduğunu bildirirlər.

"Hələ bu tapıntının tarixi və mədəni əhəmiyyətini bilmirik. Bu zona arxeoloqlarımız üçün əsl xəzinədir. Mən tapıntı ilə fəxr edirəm", – deyə ölkənin mədəni irs, fəaliyyət və turizm naziri Alberto Bonizoli "Facebook"da yazıb.

1870-ci ildə açılan, daha sonralar isə bağlandığı ilədək (1997-ci ilə qədər) kinoteatr kimi fəaliyyət göstərən teatrın sökülüb yerində dəbdəbəli yaşayış binasının tikilməsi nəzərdə tutulduğu da bildirilib. AzərTac