Anthropic süni intellekt agentlərinə şirkətlərlə müstəqil şəkildə sövdələşmələr aparmağı və mübahisələri həll etməyi öyrədəcək

Claude süni intellekt modelinin yaradıcısı olan ABŞ şirkəti Anthropic öz süni intellekt agentlərinə müstəqil şəkildə sövdələşmələr aparmağı və istifadəçilər üçün sərfəli şərtlər əldə etməyi öyrətmək məqsədilə hüquq firmaları ilə danışıqlar aparır. Oxuməni. az xəbər verir ki, bu barədə Financial Times qəzeti şirkətin planları ilə tanış olan iki mənbəyə istinadən yazır. Söhbət süni intellekt agentlərinin məhsulların qiymətini müzakirə edə, müştəri dəstəyi xidmətləri ilə mübahisələri həll edə, pulun geri qaytarılmasına dair razılığa gələ və hətta əmək müqavilələrinin şərtlərini müzakirə edə biləcəyi vəziyyətlərdən gedir.

Süni intellekt agentləri adi çatbotlardan istifadəçilərin tapşırıqlarını ardıcıl əməliyyatlar həyata keçirməklə müstəqil şəkildə yerinə yetirə bilmələri ilə fərqlənirlər. Anthropic süni intellekt agentlərinin insanlar adından bir-biri ilə qarşılıqlı əlaqədə olacağı və danışıqlar aparacağı gələcəyə hazırlaşır. Bununla belə, tərəflərin maraqları bir-birinə zidd ola bilər. Məsələn, alıcının agenti qiyməti aşağı salmağa, satıcının agenti isə məhsulu daha baha qiymətə satmağa çalışacaq.

FT-nin məlumatına görə, Anthropic hüquqşünaslara və digər hüquq mütəxəssislərinə müraciət edərək vəkillərin və müştəri nümayəndələrinin onların maraqlarını qoruyarkən, eyni zamanda ədalət prinsiplərinə necə riayət etdiklərini öyrənir. Şirkət süni intellekt agentlərinin danışıqlarda nə dərəcədə israrlı olmalı olduqlarını, hansı hallarda istifadəçidən təsdiq istəməli olduqlarını və digər agentlərə nə dərəcədə etibar etməli olduqlarını araşdırır. Nəzərdən keçirilən variantlardan biri agentlərə istifadəçilər tərəfindən imzalanmış, onların səlahiyyət və məhdudiyyətlərini müəyyən edən sənədlərin təqdim edilməsidir. Anthropic nəşrin məlumatlarını şərh etməkdən imtina edib.

Şirkət artıq süni intellekt agentləri arasında avtonom danışıqlarla bağlı təcrübələr aparıb. Project Deal layihəsi çərçivəsində Claude agentləri Anthropic əməkdaşlarına məxsus real əşyaların satışı üzrə ümumi məbləği 4 min dollardan çox olan 186 sövdələşməni müstəqil şəkildə həyata keçiriblər. Şirkətin bildirdiyinə görə, təcrübədə iştirak edən 69 agent insanların müdaxiləsi olmadan məhsulları müəyyən edib, qiymət təklifləri irəli sürüb, qiymət barədə danışıqlar aparıb və razılaşmalar əldə ediblər. Eyni zamanda, daha güclü Claude Opus 4.5 modeli ölçülən göstəricilərin əksəriyyəti üzrə daha zəif Haiku 4.5 modelini üstələyib.

Anthropic-in sentyabr ayında nəticələrini açıqladığı başqa bir təcrübədə şirkət əməkdaşları süni intellekt agentlərinə kitabları özləri üçün ən maraqlı olan kitablarla dəyişdirməyi tapşırıblar. Agentlər müstəqil şəkildə kitablarını təklif edib, mübadilə şərtlərini müzakirə edib və bir-biri ilə sövdələşmələr bağlayıblar. Maksimum dərəcədə sərt davranmaq tapşırığı verilən agentlər bir qədər yaxşı nəticələr əldə ediblər. Əməkdaşlığa daha çox meyilli agentlər isə bəzən hər bir iştirakçının istədiyi kitabı əldə etməsi üçün bilərəkdən özləri üçün daha az sərfəli mübadilələrlə razılaşıblar.

Belə danışıqların hansı qaydalar əsasında aparılmalı olduğu məsələsini müstəqil tədqiqatçılar da araşdırırlar. Harvard Biznes Məktəbinin dosenti Mişel Vakkaro əmək müqavilələrinin və mənzil kirayəsinin şərtləri də daxil olmaqla, süni intellekt agentləri arasında 180 mindən çox danışıqlar aparıb. Tədqiqatçılar müəyyən ediblər ki, agentlər qarşı tərəfin istifadəçinin maraqlarını qorumasına mane olan üsullardan istifadə edə bilirlər. Bir halda agent digər agentdən məxfi məlumat əldə etməyə çalışıb. Bunun üçün o, modelin davranışını dəyişdirmək məqsədilə xüsusi hazırlanmış təlimatlardan ibarət “prompt inyeksiyası” adlanan üsuldan istifadə edib.

Vakkaronun sözlərinə görə, inkişaf etmiş süni intellekt agentləri peşəkar danışıqlar aparmaq bacarıqlarını əvvəllər mütəxəssis tutmağa imkanı olmayan insanlar üçün də əlçatan edə bilər. Lakin bunun əksinə olan risk də mövcuddur: əgər ən güclü modellər əsasən imkanlı istifadəçilər üçün əlçatan olarsa, danışıqların iştirakçıları arasındakı bərabərsizlik daha da dərinləşə bilər.

Almaz Həsənli