Alimlər qırmızı ətdən imtina etməyin ömrü uzadıb-uzatmadığını araşdırıblar
Qırmızı və emal olunmuş ətdən imtina etmək daha uzun ömrə zəmanət vermir, lakin onun az miqdarda istehlakı ölüm riskinin bir qədər azalması ilə əlaqələndirilir. ABŞ alimləri təxminən bir milyon insanın məlumatları üzərində 38 il ərzində apardıqları təhlil nəticəsində belə qənaətə gəliblər. Oxuməni.az xəbər verir ki, tədqiqatın nəticələri "Current Developments in Nutrition" (CDN) jurnalında dərc olunub.
Tədqiqatçılar "Cancer Prevention Study II" adlı genişmiqyaslı araşdırmanın 988 378 iştirakçısının məlumatlarını öyrəniblər. Müşahidə müddəti orta hesabla 27,5 il təşkil edib və bu müddət ərzində 626 017 nəfər vəfat edib.
İştirakçılar qırmızı və emal olunmuş ət istehlakı səviyyəsinə görə qruplara bölünüb, həmçinin yalnız ağ ət yeyən və ya ətdən demək olar ki, tamamilə imtina edən insanlar üçün xüsusi qruplar ayrılıb.
Yaş, cins, siqaret çəkmə, bədən kütləsi indeksi, sağlamlıq vəziyyəti və digər amillər nəzərə alındıqdan sonra məlum olub ki, məhz qırmızı və emal olunmuş ətin az istehlakı daha aşağı ölüm göstəriciləri ilə ən ardıcıl şəkildə əlaqəlidir. Quzu, mal və donuz ətini çox istehlak edən qrupla müqayisədə, bu cür qidalanan iştirakçılarda istənilən səbəbdən, ürək-damar xəstəliklərindən, xərçəngdən və insultdan ölüm riski bir qədər aşağı olub. İnsult üçün nisbi riskin azalması təxminən 4% təşkil edib.
Bununla belə, yalnız ağ ətə keçid və ya ətdən tamamilə imtina etmək ömür uzunluğu ilə eyni dərəcədə davamlı bir əlaqə göstərməyib. Bəzi qruplarda tədqiqatçılar həqiqətən də ölüm nisbətinin azaldığını müşahidə etsələr də, nəticələr iştirakçıların yaşı, cinsi və digər xüsusiyyətlərindən asılı olaraq dəyişib.
Alimlər vurğulayırlar ki, bu iş qırmızı ətdən imtina etməyin birbaşa ömrü uzatdığını sübut etmir. Tədqiqat müşahidə xarakterli olub və rasion yalnız işin əvvəlində — 1982-ci ilin anket sorğusu əsasında qiymətləndirilib. Bundan əlavə, ət istehlak etməyən insanların qrupları nisbətən kiçik olub.
Almaz Həsənli
