Süd məhsulu bağırsaqları təhlükəli iltihabdan qoruyan vasitə adlandırılıb

At südü (madyan südü) bağırsaqları kolorektal xərçəng riskini artıran xroniki iltihabi xəstəlik olan xoralı kolitdən qoruya bilər. Oxuməni.az xəbər verir ki, bu qənaətə "Food & Function" (F&F) jurnalında tədqiqat nəticələrini dərc edən alimlər gəliblər.

Siçanlar üzərində aparılan eksperimentdə tədqiqatçılar at südünün və onun tərkibindəki hüceyrədənkənar vezikulların — hüceyrələr arasında bioloji aktiv maddələrin ötürülməsində iştirak edən mikroskopik hissəciklərin təsirini öyrəniblər. Hər iki variant xəstəliyin simptomlarını əhəmiyyətli dərəcədə zəiflədib: iltihabı azaldıb, bağırsağın selikli qişasını bərpa edib, iltihabəleyhinə molekulların səviyyəsini aşağı salıb və heyvanların vəziyyətini yaxşılaşdırıb.

Bundan əlavə, at südü bağırsaq mikroflorasının tərkibini normallaşdırmağa kömək edib. O, qida liflərinin emalı ilə əlaqəli faydalı bakteriyaların sayını artırıb, hüceyrədənkənar vezikullar isə bağırsaqların qorunmasında və iltihabın azaldılmasında mühüm rol oynayan yağ turşusu istehsal edən mikroorqanizmlərin artmasına kömək edib.

Müəlliflər qeyd edirlər ki, at südü xəstəliyə bir neçə istiqamətdə eyni vaxtda təsir göstərir: immun cavabı tənzimləyir, bağırsaq mikrobiotasının balansını bərpa edir və maddələr mübadiləsini yaxşılaşdırır.

Almaz Həsənli