Tərəvəzlərdə nitratların miqdarını əhəmiyyətli dərəcədə azaltmağın sadə yolu açıqlanıb

Tərəvəz və meyvələri bişirmək, həmçinin onların qabığını soymaq tərkibindəki nitratların miqdarını azaldır. Oxuməni.az xəbər verir ki, bu barədə Kazan Dövlət Aqrar Universitetinin bitkiçilik və meyvə-tərəvəzçilik kafedrasının dosenti, kənd təsərrüfatı elmləri namizədi Qalina Abramova "Gazeta.ru"-ya müsahibəsində bildirib.

"Gəlin ondan başlayaq ki, nitratlar istisnasız olaraq bütün bitkilərdə var — bu, kənd təsərrüfatının kimyalaşmasının nəticəsi deyil, azot mübadiləsinin normal bir hissəsidir. Azot zülalların və xlorofilin sintezi üçün vacibdir və bitki onu nitrat duzları şəklində toplayır. Problem o zaman yaranır ki, bitki topladığı maddəni emal etməyə çatdırmır — bu, həddindən artıq gübrələmə, işıqlandırmanın çatışmazlığı və ya vaxtından əvvəl yığım zamanı baş verir. May ayında istixanada yetişdirilən xiyarda iyul ayında açıq sahədə yetişdirilən xiyara nisbətən xeyli çox nitrat olur. Bu, istehsalçının pis olması ilə deyil, istixanada gün işığının daha qısa olması və gübrələmənin daha intensiv aparılması ilə bağlıdır", — deyə Abramova izah edib.

Alimin sözlərinə görə, nitratlar meyvənin ətli hissəsində deyil, keçirici toxumalarda: qabıqda, gövdələrdə, saplaqlarda, yarpaq damarlarında, meyvə sapının ətrafında və kələmin qoçanında toplanır.

"Bu o deməkdir ki, qabığı soyulmuş xiyar, üst yarpaqları və qoçanı təmizlənmiş kələm bu baxımdan artıq xeyli təhlükəsizdir. Bişirmə prosesi nitratların miqdarını 50–80% azaldır — onlar suya keçir, buna görə də ilk bişmə suyunu tökmək daha yaxşıdır. Lakin istənilən halda, sağlam bir yetkin insan üçün adi qida rasionunda riskin real miqyası böyük deyil, çünki nitratlar orqanizmdə toplanmır və xaric olunur", — deyə mütəxəssis yekunlaşdırıb.

Almaz Həsənli