Qurbağadan tapılan bakteriya xərçəng hüceyrələrini məhv edib
Yapon ağac qurbağalarının (Dryophytes japonicus) bağırsaqlarında yaşayan Ewingella americana bakteriyası, kolorektal xərçəng modeli olan siçanların 100%-də bir damardaxili inyeksiyadan sonra bədxassəli şişləri məhv edib. Oxuməni.az xəbər verir ki, Yaponiya Qabaqcıl Elm və Texnologiya İnstitutunun alimlərinin apardığı tədqiqat "Gut Microbes" jurnalında dərc olunub.
İnyeksiyadan sonra 24 saat ərzində bakteriya sağlam toxumalara nisbətən şişdə təxminən 3000 dəfə daha intensiv toplanıb ki, bu da ətrafdakı orqanlara zərər vermədən hədəfə alınmış hücumu təmin edib. Yarımxaricolma dövrü cəmi 1,2 saat təşkil edib: bakteriya bir sutka ərzində orqanizmdən tamamilə yoxa çıxıb.
Mexanizm ikili xarakter daşıyıb. Birincisi, Ewingella americana xərçəng hüceyrələrini fiziki olaraq parçalayır. İkincisi, immun kaskadını işə salır: T və B limfositlərini, neytrofilləri aktivləşdirir, TNF-α və interferon-γ ifrazını stimullaşdırır. Görünür, bakteriya xərçəngin immun hüceyrələrindən gizlənmək üçün istifadə etdiyi "toxunma" siqnalı olan CD47 zülalını bloklayır.
Birbaşa müqayisədə Ewingella americana onkoterapiyanın iki standartını: anti-PD-L1 immun inhibitorunu və liposomal doksorubisin kimyəvi preparatını üstələyib.
Tədqiqatın müəllifləri — Seyqo İvata, Naqi Yamaşita, Kensuke Asukabe, Matomo Sakari və Eydziro Miyako vurğulayırlar ki, bu, amfibiyaların bağırsaqlarından götürülmüş bakteriyanın tətbiqi ilə tam şiş cavabı alınan ilk tədqiqatdır. İnsanlar üzərində klinik sınaqlara qədər əlavə təhlükəsizlik yoxlamaları tələb olunsa da, nəticələr "canlı" şiş əleyhinə terapiyada prinsipial olaraq yeni bir istiqamət açır.
Almaz Həsənli
