Gəncliyin inkişafı üzrə Dövlət Proqramının icrasına 80 mln. manat ayrılacaq

Qarşıdakı 4 ildə "Azərbaycan gəncliyi 2011-2015-ci illərdə" Dövlət Proqramının icrasına 80 mln. manat vəsait ayrılacaq. bu barədə Gənclər və İdman nazirinin müavini İntiqam Babayev bildirib. Onun sözlərinə görə, vəsaitin ayrılması 2012-ci ildən başlanacaq: "Birinci il 20 mln. manat ayrılacaq".

İ.Babayev qeyd edib ki, gələn ilin gəncliyin inkişafı sahəsində yeni qurum - Gənclər Fondu yaradılacaq. Fond gənclərlə iş sahəsində elmi, mədəni, təhsil, sosial inkişaf və digər sahələrdə layihələrin həyata keçirilməsi üçün nəzərdə tutulub: "Fondun vəsaitləri hesabına həm ölkədaxili, həm də beynəlxalq layihələr icra olunacaq, gənclər təşkilatlarının müxtəlif təşəbbüsləri dəstəklənəcək, gənc alimlərin fəaliyyətinin əlavə stimullaşdırılması həyata keçiriləcək, xaricdən olan gənc tədqiqatçı və alimlərin Azərbaycanla bağlı tədqiqatlarına dəstək veriləcək".
Nazir müavini deyib ki, Gənclər Fondunun əsasnaməsi artıq hazırdır və hazırda hüquqi ekspertizası keçirilir: "Gələn il əsasnamə təsdiqləndikdən sonra fondun fəaliyyətə başlaması gözlənilir. Fond həm dövlət büdcəsindən, həm də kənardan maliyyələşə bilər. Bura ianələr, qrantlar, fondun öz fəaliyyəti nəticəsində əldə etdiyi gəlirlər və s. daxildir".

O.M.