Azərbaycan Respublikasının Prezidenti yanında Mənzil İnşaatı Dövlət Agentliyinin yaradılması sosial mənzillərin tikintisi ilə bağlı neçə vaxtdır müzakirə edilən layihənin reallaşmasına əsas oldu. İlin sonunadək mənzillərin inşasına başlanılacağı gözlənilir. Aztəminatlı ailələr, mənzili olmayanlar ayda təxminən 100 manat ödəməklə mənzilə sahib ola biləcəklər.

Bunu açıqlamasında Əmlak Ekspert Mərkəzinin rəhbəri Ramil Osmanlı deyib.

R.Osmanlının sözlərinə görə, yeni qurum sosial mənzillərin tikintisi üçün tenderin keçirilməsini təşkil edəcək, tikilən mənzilləri təhvil götürəcək. "Fərmanda eyni adda MMC-nin yaradılması əksini tapıb və Nazirlər Kabinetinə 2 ay müddət verilib. Doğrudur, İpoteka Fondunun yaradılması bir az yubadıldı. Amma bu qurumun strukturu tam təsdiq olunandan sonra fəaliyyətə başlayacağı gözlənilir. Tikintinin başlanılması üçün torpaq sahəsinin ayrılması və digər məsələlərə başlanacaq. İlin sonunadək tikintiyə başlana bilər", - deyə əkspert əlavə edib.

R.Osmanlı deyir ki, yeni qurum tikinti sektoruna nəzarət etməyəcək. Yəni agentliyin tikinti sektoruna nəzarət edəcəyi, şirkətlərin fəaliyyətini yoxlayacağı ilə bağlı məlumatlar yanlışdır: "Tikinti sektoruna icazələrin verilməsi, şirkətlərə nəzarət edilməsi kimi səlahiyyətlər agentliyin fəaliyyətinə daxil deyil. Agentlik əsasən dövlət vəsaiti hesabına mənzillərin tikintisi ilə məşğul olacaq".

Mediainfo.az