Gürcüstanda Anaklia limanı tikiləcək

Gürcüstan hökuməti Anaklia dərin su limanını qlobal təcrübədə ən çox istifadə edilən sözdə "torpaq sahibi" modeli ilə tikmək qərarına gəlib.

Oxuməni.az-ın “ apsny.ge”-yə istinadla verdiyi məlumata görə, Gürcüstanın İqtisadiyyat və Dayanıqlı İnkişaf Naziri Mariam Kvrivişvili brifinq zamanı bunu bildirib.

Onun sözlərinə görə, tikinti zamanı dünyada geniş yayılmış "torpaq sahibi" modeli istifadə olunacaq ki, bu modeldə dövlət əsas dəniz və liman infrastrukturunun sahibi olaraq qalacaq. Lakin limanın idarə edilməsi bir neçə ölkə və beynəlxalq şirkətlə tərəfdaşlıq əsasında həyata keçiriləcək.

"Bu, limana yüklərin cəlb edilməsi və müvafiq olaraq onun mümkün qədər səmərəli fəaliyyəti üçün ən yaxşı şərait yaradacaq. Liman infrastrukturunun yaradılması ilə yanaşı, dövlət Anakliyaya qədər avtomobil və dəmir yolunun təchiz edilməsini təmin edəcək, konteyner və dökmə yüklər terminallarının yaradılması üçün zəruri investisiyalar isə beynəlxalq investorlar və özəl operatorlar tərəfindən həyata keçiriləcək", - deyə o qeyd edib.

Gürcüstan hökuməti xüsusilə "Orta Dəhliz" iştirakçısı olan ölkələrin, o cümlədən Çinin, Mərkəzi Asiya dövlətlərinin və Azərbaycanın Anaklia limanına investisiyalarını alqışlayır.

"Bu, Gürcüstan hökumətinin ən mühüm qərarıdır, ölkənin milli maraqlarını daha da gücləndirəcək, yeni iqtisadi imkanlar yaradacaq və Gürcüstanı "Orta Dəhliz" layihəsinin əsas iştirakçılarından birinə çevirəcək", - deyə Mariam Kvrivişvili bildirib.

Almaz Həsənli