Bosniya Rusiya qazından imtina edib, əvəzində ABŞ-dan mavi yanacaq alacaq

Bosniya və Herseqovina Donald Trampın ətrafı ilə əlaqəli bir şirkətlə qaz kəməri tikintisi üçün müqavilə imzalayıb. Bu barədə Al Jazeera məlumat yayıb.
Bosniya və Herseqovina yeni qaz kəməri tikintisi üçün strateji müqavilə imzalayıb. Bu layihə ölkəni Rusiya yanacağından asılılıqdan birdəfəlik azad etmək məqsədi daşıyır. Lakin müqavilə artıq böyük siyasi qalmaqala səbəb olub. Brüssel xəbərdarlıq edir ki, belə bir addım Bosniyanın Avropa Birliyinə qapısını bağlaya bilər.
Müqavilə Dubrovnikdə Bosniya Baş naziri Boryana Kristo və Xorvatiya Baş naziri Andrey Plenkoviç arasında keçirilən sammitdə imzalanıb. Əsas məqsəd, Rusiyadan enerji alışına AB-nin tam qadağası qüvvəyə minənə qədər müqaviləni tamamlamaqdır.
Sarayevo hazırda tamamilə Moskvadan gələn tədarükdən asılıdır və bu da ölkəni həssas edir. Yeni boru kəməri Bosniyanı Xorvatiyanın Krk adasındakı mayeləşdirilmiş təbii qaz (LNG) terminalına birləşdirəcək. Bu, Amerika qazının yolunu açacaq.

Boryana Kristo bu inkişafı "irəliləyişin vacib bir addımı" adlandırıb və şaxələndirmənin ölkəni gücləndirəcəyinə əmindir. Lakin belə bir müstəqilliyin qiyməti çox yüksək ola bilər.

Tikinti xərclərinin 1,5 milyard dollar olduğu təxmin edilir. Bu, sadəcə bir boru kəməri deyil. Plana yeni qazla işləyən elektrik stansiyalarının tikintisi daxildir. Bu, ölkənin "çirkli" kömürdən uzaqlaşmağa başlamasına imkan verəcək.

Əziz MUSTAFA