Rusiyada 14 sm-dən kiçik bananların satışı qadağan ediləcək

Rusiyaya idxal edilən bananlar üçün yeni dövlət standartı (ГОСТ, QOST) təsdiqlənib. Oxuməni.az-ın “RBC”-ya istinadən verdiyi məlumata görə, Federal Texniki Tənzimləmə və Metrologiya Agentliyinin saytında dərc olunan sənədə əsasən, bu standart 2026-cı il martın 1-dən qüvvəyə minəcək.
Beləliklə, standart Rusiyaya mağazalarda satılmaq üçün gətirilən bananlara şamil ediləcək. İndi ölkə ərazisinə gətirilən bananlar xarici görünüş, dad, qoxu və yetişmə dərəcəsi üzrə tələblərə uyğunluq baxımından yoxlanılacaq.
Sarı bananların idxalı qadağan edilir. İndi satışa yaşıl və ya açıq yaşıl rəngli meyvələr çıxarılacaq ki, onlar Rusiya anbarlarında və ya digər xüsusi ayrılmış yerlərdə yetişə bilsinlər.
Banan salxımında saplağı qalmış bir ədəddən artıq kəsilmiş meyvə olmamalıdır. Meyvələr xiyar qoxusu verməli, kəsilərkən süd şirəsi ifraz etməlidir. Ekstra sinif bananların uzunluğu ən azı 20 sm, birinci sinif bananların uzunluğu ən azı 19 sm, ikinci sinif bananların uzunluğu isə ən azı 14 sm olmalıdır. Bir salxımda ekstra sinif bananların sayı ən azı dörd ədəd, birinci sinif bananların sayı da eyni olmalıdır. İkinci sinif bananların sayı ən azı üç ədəd olmalıdır.
Dövlət standartı (ГОСТ, QOST) ciddi şəkildə məcburi deyil, tövsiyə xarakteri daşıyır və istehsalçılar üçün bir istiqamət rolunu oynayır. Lakin xüsusi hallarda, qanunlarda, müqavilələrdə və ya texniki reqlamentlərdə onlara istinad edildikdə, dövlət standartları məcburi xarakter daşıya bilər.
"SPAR Kalininqrad"ın baş direktor müavini Aleksey Yelayev “RBC Radiosu”na verdiyi müsahibədə bildirib ki, banan tədarükündə digər normativ sənədlər, ilk növbədə Avrasiya İttifaqının qida məhsullarının keyfiyyəti və təhlükəsizliyi haqqında texniki reqlamenti tətbiq olunur. Bundan əlavə, bananlarda "xiyar" qoxusunu müəyyən etmək üçün vahid orqanoleptik standart yoxdur, çünki bu, çox subyektiv bir ölçüdür.
Yelayev əlavə edib: "Son illərin bütün dövlət standartları kimi, bu standarta da keyfiyyətin idarə edilməsi texnikası və standart göstəricilərinin effektiv qiymətləndirilməsi baxımından çoxlu suallar var."
Almaz Həsənli