Ukrayna üzrə danışıqlarda Avropanı Əbu-Dabidə Almaniya, Fransa, Böyük Britaniya, İtaliya, NATO təmsil edəcək

Rusiyanın Ukraynaya qarşı müharibəsinə son qoymaq üçün Əbu-Dabidə keçirilən danışıqlarda Avropanı Almaniya, Fransa, Böyük Britaniya və İtaliya rəsmiləri, eləcə də NATO və AB qurumlarının nümayəndələri təmsil edəcək.

Oxuməni.az xəbər verir ki, bu barədə Politico mənbələrinə istinadən məlumat yayıb. Politico Avropa nümayəndə heyətinin tərkibində təmsil olunan rəsmilərin adlarına aydınlıq gətirib.

Politico-ya görə danışıqlarda Avropanı aşağıdakılar təmsil edəcək:

Almaniya — Günter Sautter. Kansler Fridrix Merzin xarici siyasət və təhlükəsizlik üzrə müşaviri. Ukraynanı dəstəkləmək və müharibəyə son qoymaq üçün danışıqlar aparmaq üçün Avropa səylərinin əlaqələndirilməsində iştirak edir.

İtaliya — Fabrizio Saggio, Baş nazir Giorgi Meloninin diplomatik müşaviri. İtaliya Baş nazirinin əsas xarici siyasət məsləhətçilərindən biri olan o, mürəkkəb diplomatik məsələləri həll etməyə çağırılır.

NATO - Ceffri van Leuven, NATO Baş katibi Mark Ruttenin Aparat rəhbəri. Əvvəllər o, Niderlandda ticarət naziri və milli təhlükəsizlik müşaviri vəzifələrində çalışıb.

Birləşmiş Krallıq - Conatan Pauell, Baş nazir Keyr Starmerin milli təhlükəsizlik müşaviri. Əvvəllər o, Toni Bleyrin köməkçisi vəzifəsində çalışıb və Şimali İrlandiya sülh prosesində iştirak edib. O, Donald Trampın xüsusi elçisi Stiv Vitkoffla sıx əlaqə saxlayır.

Avropa Komissiyası - Byorn Seybert, Avropa Komissiyasının prezidenti Ursula fon der Leyenin Nazirlər Kabinetinin rəhbəri. Onun ən yaxın müttəfiqlərindən biri, ABŞ ilə Ukrayna və təhlükəsizlik zəmanətləri ilə bağlı əvvəlki danışıqlarda iştirak edib.

Avropa Şurası - Anna-Mariya Bura. Avropa Şurasının prezidenti Antonio Kostanın baş xarici siyasət müşaviri. Şuranın xarici siyasət işini təmsil edir.

Fransa - Emmanuel Bonne. Fransa prezidenti Emmanuel Makronun baş diplomatik müşaviri. Təcrübəli diplomat olan o, Fransa liderinin əsas xarici siyasət təşəbbüslərinin və beynəlxalq danışıqların hazırlanmasına cavabdehdir.

Xatırladaq ki, Ukraynanın danışıqlar aparan nümayəndə heyəti dünən Əbu-Dabidə görüşlər üçün yola düşüb. Ukrayna, ABŞ və Rusiya nümayəndələrinin iştirakı ilə üçtərəfli danışıqların çərşənbə axşamı və çərşənbə günləri keçirilməsi planlaşdırılır.

Həmçinin bildirilib ki, Avropa ölkələrinin Əbu-Dabi danışıqlarında Avropanın hansı səviyyədə təmsil olunması ilə bağlı fikir ayrılığı var.

Əziz MUSTAFA