Dünyanın ən güclü zəhərlərindən biri olan "Noviçok"u hazırlayan kimyaçı Vladimir Uqlev vəfat edib
"Noviçok"zəhərinin istehsalçılarından biri olan kimyaçı Vladimir Uqlev 80 yaşında Anapada vəfat edib. Onun ölümünün səbəbi və şəraiti məlum deyil.
Oxuməni.az xəbər verir ki, bu barədə The Insider-in yaydığı məlumatda deyilir. Uqlev 1946-cı ildə Rusiyanın Kirovsk şəhərində anadan olub. Mendeleyev adına Moskva Kimya Texnologiyaları İnstitutunu Bioloji Aktiv Maddələrin Kimyası və Texnologiyası ixtisası üzrə bitirib. 1975-ci ildən 1990-cı ilə qədər Saratov vilayətindəki Üzvi Kimya və Texnologiya üzrə Dövlət Tədqiqat İnstitutunun Volsk filialında baş elmi işçi kimi çalışıb. Bu qurum, digərləri ilə yanaşı, zəhərli maddənin hazırlanmasında iştirak edib.
Uqlev 2018-ci ildə İngiltərənin Solsberi şəhərində keçmiş Rusiya kəşfiyyat zabiti Sergey Skripal və qızı Yuliyanın zəhərlənməsi ilə bağlı mediaya şərh verərkən geniş diqqət çəkib. 2020-ci ildə Aleksey Navalnının sui-qəsd cəhdindən sonra biokimyaçı jurnalistlərə hərbi dərəcəli sinir agentləri sinfi olan "Noviçok"un iş prinsipini də izah edib.
Uqlev BBC-yə verdiyi müsahibədə bildirib ki, Rusiyada"Noviçok" A-234 kod adı ilə tanınır. Skripalların bu maddə ilə zəhərləndiyinə şübhə etmirdi.
"Şübhəsiz ki, bu, A-234 idi. Nümunənin yüksək təmizliyinə görə, bunun mənim özüm istehsal etdiyim bir partiya olması tamamilə mümkündür", - deyə kimyaçı bildirib.
Mühafizəkar jurnalist Hristo Qrozev qeyd edib ki, bu güclü toksinin hazırlanmasında məsul olan Uqlev sonradan onun mülki şəxslərə qarşı istifadəsini kəskin şəkildə tənqid edib. O, həmçinin Kremlin Skripalların və Navalnının zəhərlənməsi ilə bağlı iddialarını açıq şəkildə təkzib edib.
Xatırladaq ki, Ukraynanı döyüş dronları ilə təmin edən Almaniyanın müdafiə şirkəti Donaustahlın rəhbəri Stefan Thumannın "Noviçok" sinir agenti ilə öldürülməsi planlaşdırılırdı. Sui-qəsd planının arxasında Rusiya kəşfiyyat xidmətləri ola bilər.
Əziz MUSTAFA
