İordaniya kilsəyə hücumda iştirak etdiyi ehtimal olunan üç şübhəlini saxlayıb

İordaniya təhlükəsizlik qüvvələri Karak əyalətinin Hamud kəndində bir kilsəyə edilən hücumda üç şübhəlini saxlayıb. Oxuməni.az xəbər verir ki, bu barədə dövlət Petra xəbər agentliyi məlumat yayıb.

İordaniyanın İctimai Təhlükəsizlik İdarəsi bildirib ki, hüquq-mühafizə orqanları əməkdaşları üç şübhəlini bazar ertəsi səhər tezdən tərk edilmiş bir evdə tapıblar. Agentliyin məlumatına görə, onlar təslim olmaqdan imtina ediblər və təhlükəsizlik qüvvələrinə atəş açıblar.

Hüquq-mühafizə orqanlarının əməkdaşları cavab atəşi açaraq hər üçünü yaraladıqdan sonra saxlayıblar. Təhlükəsizlik qüvvələri arasında xəsarət alan olmayıb. Hadisə yerində odlu silah və sursat müsadirə edilib.

Silahlı hücumçular dəfn mərasimi zamanı kilsədə atəş açıblar. İctimai Təhlükəsizlik İdarəsi saxlanılanların şübhəli əlaqəsini açıqlamayıb.

İordaniya Daxili İşlər Naziri Mazen əl-Farai cümə günü hücumun ekstremistlər tərəfindən törədildiyini bildirib, lakin əlavə edib ki, onların ölkə daxilində və ya xaricində məlum qruplarla əlaqələrinin olub-olmadığını müəyyən etmək üçün hələ tezdir. Hücuma görə heç kim məsuliyyəti öz üzərinə götürməyib.

Bazar günü ölkənin hər yerindən yüzlərlə iordaniyalı öldürülən doqquz xristiandan səkkizinin dəfn mərasimində iştirak edib. Mərasim hücumun baş verdiyi Hamudadakı eyni kilsədə keçirilib. Kral Abdullah cümə günü atışmanı terrorizm adlandırıb və günahkarları ədalət mühakiməsinə cəlb edəcəyinə söz verib.

Əziz Mustafa