Rusiya bölgəsində hakimiyyəti ələ keçirməyə cəhd edənlərə hökm oxunub

Rostov-na-Donda Cənub Rayon Hərbi Məhkəməsi Krımda hakimiyyəti ələ keçirməyə cəhd işi üzrə altı təqsirləndirilən şəxsə hökm oxuyub. Oxuməni.az xəbər verir ki, Məhkəmənin mətbuat xidməti bu barədə məlumat yayıb.

İstintaq və məhkəmə müəyyən edib ki, Ruslan Asanov və Remzi Nimetulayev Baxçisaray rayonunda Hizb ut-Təhrir əl-İslami özəyi (Rusiyada terrorçu kimi tanınan və ölkədə fəaliyyəti qadağan edilmiş təşkilat) təşkil ediblər və bu qrupa digər təqsirləndirilən şəxslər də daxil olub.

Onlar gizli görüşlər keçirib və orada "Ümumdünya İslam Xilafətinə" qoşulmaq üçün Rusiya da daxil olmaqla ölkələrin siyasi sistemlərini və hökumət strukturlarını dəyişdirmək planlarını müzakirə ediblər. Bu məqsədlə təbliğat və zorakı metodlardan istifadə etməyi planlaşdırıblar. Təqsirləndirilən şəxslər həmçinin öz ideyalarını yayıb və yeni üzvlər cəlb ediblər.

Nəticədə Asanov 19 il, Nimetulayev isə 18 il həbs cəzası alıb. Qalan təqsirləndirilən şəxslərin hər biri 15 il müddətinə azadlıqdan məhrum edilib. İlk dörd il həbsdə, qalan hissəsi isə ciddi rejimli cəzaçəkmə müəssisəsində çəkiləcək.

Əvvəllər Severodvinskdə terror fəaliyyətini haqlı çıxardığına görə bir nəfərin həbs olunduğu bildirilirdi.

Əziz Mustafa