İstanbulda güclü yağış həyatı iflic edib, yolları, evlərin zirzəmilərini su basıb

Çərşənbə axşamı Türkiyə Meteorologiya Xidmətinin xəbərdarlıqlarından sonra leysan yağış başladı. Esenyurt və Sultanqazi də daxil olmaqla, şəhərin bir neçə ərazisində yolları, yeraltı keçidləri, yaşayış binalarını, mağazaları və zirzəmiləri su basdı. Eyüpsultan və Qaziosmanpaşa rayonlarında yolların bir hissəsi çökdü. Oxuməni.az xəbər verir ki, bu barədə Habeler.com-un məlumatında deyilir.

Hakimiyyət orqanları 1277 daşqın hadisəsi və 15 torpaq sürüşməsi qeydə alıb, 47 nəfər isə fırtınanın nəticələri səbəbindən yolda qalıb. 800-dən çox ev, 280 müəssisə və 76 nəqliyyat vasitəsi fırtına nəticəsində zərər görüb.
Su həmçinin iki xəstəxanaya daxil olub və Hacıosman metro stansiyasının tavanı aşıb. Sultanqazidə şagirdlər dərsdə olarkən ibtidai məktəbdə istinad divarı uçub; xəsarət alanlar barədə məlumat verilməyib.

İstanbul valisi Davut Gül sakinləri mütləq zərurət olmadığı təqdirdə evdə qalmağa çağırıb. O, zirzəmi mənzillərinin sakinlərinə gecəni yuxarı mərtəbələrdə keçirməyi və çay yataqlarından, yeraltı keçidlərdən və daşqınlara meylli digər ərazilərdən çəkinməyi tövsiyə edib.

Şəhərdə dərslər dayandırılıb və motosiklet hərəkəti çərşənbə axşamı saat 21:00-dan etibarən növbəti xəbərdarlığa qədər qadağan edilib. Təxminən 8000 işçi, 2000 nəqliyyat vasitəsi və tikinti texnikası fəsadların aradan qaldırılması üçün səfərbər edilib.

Ən çox yağıntı, təxminən 194 mm, İstanbulun Asiya tərəfindəki Beykozun Ömerli rayonuna düşüb. Mer vəzifəsini icra edən Nuri Aslan bildirib ki, metropolun bəzi yerlərində 12 saat ərzində təxminən 100 mm yağış yağıb.

Əziz MUSTAFA