Almaniya Suriya qaçqınlarının statuslarını kütləvi şəkildə ləğv edir

Almaniya Miqrasiya və Qaçqınlar üzrə Federal İdarəsi (BAMF) suriyalılara müdafiə statuslarını ləğv edən məktublar göndərməyə başlayıb.

Oxuməni.az xəbər verir ki, bununla bağlı Bild-in məlumatına görə, bu məktublar əsasən polisin diqqətini cəlb edən və ya Almaniyanı tərk edib sonra geri qayıdan şəxslərə göndərilir.

Almaniya hökumətinin əsas arqumenti 2024-cü ilin dekabrında Bəşər Əsəd rejiminin devrilməsindən sonra Suriyadakı vətəndaş müharibəsinin bitməsidir. BAMF hesab edir ki, keçid hökuməti ərazinin böyük hissəsinə nəzarət edir, İŞİD də daxil olmaqla silahlı qruplar isə artıq mövcud hökumət üçün real təhlükə yaratmır.

Əlavə arqument olaraq agentlik BMT-nin məlumatlarına istinad edir: 2024-cü ilin dekabrından 2026-cı ilin martına qədər 1,5 milyondan çox insan Suriyaya qayıdıb.

BAMF Suriyada ərzaq və mənzil çatışmazlığının davam etdiyini, qiymətlərin yüksək olduğunu və elektrik enerjisi təchizatının fasilələrlə olduğunu etiraf edir. Lakin rəsmilər bu çətinliklərin evə qayıtmağı qeyri-mümkün etmədiyini iddia edirlər.

Lakin, qoruma statusunun ləğvi dərhal deportasiya demək deyil: müvafiq qərarlar hələlik insanların Almaniyanı tərk etməsini tələb etmir.

Rəsmi məlumatlara görə, Almaniyada təxminən 916.000 Suriya vətəndaşı yaşayır. Kansler Fridrix Merz əvvəllər hökumətin məqsədinin ölkədəki suriyalıların 80%-ni vətənlərinə qaytarmaq olduğunu bildirmişdi.

Xatırladaq ki, Avropada sığınacaq müraciətlərinin sayı azalmaqda davam edir. İlin birinci yarısının nəticələrinə əsasən, Almaniya Avropa ölkələri arasında dördüncü yeri tutub.

Əziz MUSTAFA