Oksford və Kembric ardıcıl ikinci ildir ki, Britaniya universitetlərinin ilk üçlüyünə düşə bilməyib
Kembric və Oksford universitetləri "The Times" və "Sunday Times Good University Guide" reytinqində ardıcıl ikinci ildir ki, Böyük Britaniyanın ən yaxşı üç universiteti siyahısına düşə bilməyib. Kembric siyahıda dördüncü, Oksford isə beşinci yerdə qərarlaşıb. Oxuməni.az xəbər verir ki, bu barədə "The Times" məlumat yayıb.
Cari reytinqdə birinci yeri ötən ilin lideri olan London İqtisadiyyat Məktəbini geridə qoyan Sent-Endryus Universiteti tutub. Beləliklə, reytinqə ilk dəfə Şotlandiyadan olan bir ali təhsil müəssisəsi başçılıq edib.
Cari reytinqdə "İlin universiteti" adına London İmperial Kolleci layiq görülüb. O, həmçinin məzunların gələcək işlə təmin olunması baxımından ən yaxşı ali məktəb seçilib. Ekspertlər kollecin uğurunu təhsildə innovativ yanaşmaların tətbiqi ilə əlaqələndirirlər.
Almaz Həsənli
