Vens İranda gizli əməliyyatların keçirilməsinin mümkünlüyünü istisna etməyib
ABŞ İrana təzyiq göstərmək məqsədilə, o cümlədən gizli təxribat əməliyyatlarına əl ata bilər. Oxuməni.az xəbər verir ki, bunu ABŞ-ın vitse-prezidenti Cey Di Vens Ağ Evdə jurnalistlər üçün keçirilən brifinqdə bildirib.
“Onlarla danışmırıq və onlar ticarət gəmilərinə hücumları dayandırmayana qədər danışmaq fikrində də deyilik”, — deyə Vens jurnalistlərə bildirib.
Onun sözlərinə görə, Prezident Donald Trampın administrasiyasının Tehrana təsir göstərmək üçün müxtəlif vasitələri qalmaqdadır.
“Edilə biləcək hər şey siyahıdadır: iqtisadi təzyiq, hərbi təzyiq, diplomatik təzyiq, gizli təzyiq”, — deyə vitse-prezident bildirib.
Vens bu sözləri Trampın iranlılara müraciətindən sonra ABŞ-ın İrana gizli müdaxiləsinin mümkünlüyü ilə bağlı suala cavab olaraq deyib. Bununla yanaşı, o, administrasiyanın mümkün planlarını açıqlamaqdan imtina edib.
“Bunlar prezidentin ixtiyarında olan alətlərdir”, — deyə Vens qeyd edib və əlavə edib ki, milyonlarla insanın izlədiyi auditoriya qarşısında konkret planlar barədə açıq danışmaq ağılsızlıq olardı.
Bu açıqlamalar ABŞ ilə İran arasında hərbi qarşıdurmanın yeni mərhələyə keçdiyi bir vaxtda səslənib. Çərşənbə gününə keçən gecə ABŞ hərbçiləri İran ərazisindəki obyektlərə bir sıra genişmiqyaslı zərbələr endirib. ABŞ Silahlı Qüvvələrinin Mərkəzi Komandanlığının məlumatına görə, hədəflər arasında İslam İnqilabı Keşikçiləri Korpusunun obyektləri, o cümlədən hava hücumundan müdafiə sistemləri, radar stansiyaları, dəniz vasitələri və rabitə obyektləri olub.
İran buna cavab olaraq Yaxın Şərqin bir neçə ölkəsindəki ABŞ hərbi obyektlərinə raketlər və pilotsuz uçuş aparatları ilə zərbələr endirib.
Vaşinqtonla Tehran arasında danışıqlar faktiki olaraq dondurulub. Avqustun sonunda Tramp davam edən qarşıdurma və Hörmüz boğazı ətrafındakı vəziyyət fonunda İranla razılaşmanın əldə olunmasının məqsədəuyğunluğuna şübhə etdiyini bildirib.
Almaz Həsənli
