Volkswagen 50 min iş yerini ixtisar edəcək
Volkswagen-in Müşahidə Şurası cümə axşamı restrukturizasiya planını təsdiqləyib. Plan şirkətin ağır tariflərə, artıq istehsal güclərinə və Çin rəqiblərinin aqressiv rəqabətinə qarşı mübarizə cəhdləri çərçivəsində daha 50 min iş yerinin ixtisarını nəzərdə tutur. Oxuməni.az xəbər verir ki, bu barədə Reuters məlumat yayıb.
Volkswagen-in 89 illik tarixində ən genişmiqyaslı restrukturizasiyanı nəzərdə tutan bu plan Almaniyada yerləşən və növbəti onillik ərzində modellərin istehsalının tədricən dayandırılacağı dörd zavod üçün alternativ variantların axtarılmasını nəzərdə tutur.
Plan həmçinin həmkarlar ittifaqları ilə ciddi qarşıdurmadan yayınmağa imkan verir. Bununla da səhmdarların növbədənkənar ümumi yığıncağının keçirilməsi ssenarisi arxa plana keçirilib. Rəhbərlik bu ssenarini işçilərin və Volkswagen-in ikinci ən böyük səhmdarı olan Aşağı Saksoniya federal torpağının mövqeyinə zidd olaraq öz planlarını həyata keçirmək vasitəsi kimi nəzərdən keçirirdi.
Bu razılaşma Volkswagen-in konqlomerat strukturunun sadələşdirilməsinə və həmkarlar ittifaqları ilə Aşağı Saksoniyanın əsas qərarların qəbulunda çoxluğa malik olduğu qrupun Müşahidə Şurasının təsirinin məhdudlaşdırılmasına gətirib çıxaracaq.
“Bu, Volkswagen konserninin gələcəyi ilə bağlı güclü siqnaldır. Biz bütün əməkdaşlarımız, tərəfdaşlarımız və dünyanın hər yerində sənayedəki iş yerləri üçün məsuliyyəti öz üzərimizə götürürük”, — deyə baş direktor Oliver Blume açıqlamasında bildirib.
Frankfurt birjasında ticarət olunan Volkswagen səhmləri bu xəbərin yayılmasından sonra 7,9% bahalaşaraq sessiyanı başa vurub. Bu artım mənbələrin sözlərinə görə, vəziyyətin Avropanın ən böyük avtomobil istehsalçısı üçün misli görünməmiş böhrana çevrilə biləcəyi ilə bağlı narahatlığın azalmasını əks etdirib.
Sənaye analitiki Ferdinand Dudenhöffer bildirib ki, növbəti 10 ay ərzində Volkswagen-in Emden, Tsvikau, Nekkarzülm və Hannover şəhərlərindəki zavodlarının gələcəyi ilə bağlı müzakirələr davam edəcək. Bu zavodlarda fəaliyyət 2031-ci ildən etibarən mərhələli şəkildə dayandırılacaq.
Almaz Həsənli
