Qazaxıstan əhalisinin sayı 20,6 milyonu ötüb

Qazaxıstanda iyul ayı ərzində əhalinin sayı 14,2 min nəfər artıb və avqustun 1-nə olan məlumata görə, ümumi say 20 milyon 604,8 min nəfərə çatıb. Oxuməni.az xəbər verir ki, bu barədə "Kazinform" Milli Statistika Bürosuna istinadən məlumat yayıb.

İlin əvvəlindən Qazaxıstan əhalisi 104 997 nəfər artıb. Artım tempi iyulun 1-dəki 0,44%-dən avqustun 1-də 0,51%-ə yüksəlib. Bununla yanaşı, artımın əsas mənbəyi olaraq təbii artım qalmaqdadır. 2026-cı ilin ilk yeddi ayı ərzində bu göstərici 99 419 nəfər təşkil edib.

Miqrasiya artımı isə əksinə, demək olar ki, dəyişməyib. Miqrasiya saldosu iyulun 1-dəki 5 703 nəfərdən avqustun 1-də 5 578 nəfərə düşüb (125 nəfər azalma).

Ən nəzərəçarpacaq dinamika şəhərlərdə müşahidə olunub. Şəhər əhalisinin sayı bir ay ərzində 13 milyon 190 min 600-dən 13 milyon 211 min 800 nəfərə, yəni 21 174 nəfər artıb. Müqayisə üçün qeyd edək ki, ilin ilk altı ayında şəhərlərdə 105 475 nəfər artım olmuşdu.

Kənd yerlərində isə tendensiya əksinə olub. İyulun 1-də kəndlərdə təxminən 7 milyon 400 min nəfər yaşayırdısa, avqustun 1-nə bu göstərici təxminən 6,9 min nəfər azalaraq 7 milyon 393 minə düşüb.

Bununla belə, kənd əhalisinin təbii artımı müsbət olaraq qalır. İlin əvvəlindən bu rəqəm 38 684 nəfər təşkil edib.

Respublika tabeli şəhərlər arasında mütləq artıma görə lider paytaxt olaraq qalır. Astananın əhalisi iyulun 1-dəki 1 milyon 682 min 700 nəfərdən avqustun 1-də 1 milyon 690 min nəfərə çatıb – bir ay ərzində təxminən 7,9 min nəfər artım qeydə alınıb. İlin əvvəlindən Astananın əhalisi 51 429 nəfər və ya 3,14% artıb.

Almaz Həsənli