Beyons Kolumbiyadakı zəlzələdən zərərçəkənlərə 1 milyon dollar yardım edəcək

11:18

Bəyəndim (1) Bəyənmədim (0)

Amerikalı müğənni Beyons Kolumbiyada baş vermiş zəlzələdən zərərçəkənlərə yardım məqsədilə şəxsi vəsaitindən 1 milyon dollar ayıracaq. Oxuməni.az xəbər verir ki, bu barədə onun rəhbərlik etdiyi "Parkwood Entertainment" leyblinin mətbuat xidməti məlumat yayıb.

Maliyyə vəsaiti fəlakətdən zərər çəkmiş ərazilərdə fəaliyyətini davam etdirən təşkilatlara yönəldiləcək. Ayrılan pullar həmin bölgələrin əhalisi üçün ərzaq və ilkin tələbat mallarının alınmasına sərf olunacaq.

Beyons bu miqyasda xeyriyyə aksiyalarında ilk dəfə deyil ki, iştirak edir. Müğənni daha əvvəl də dünyanın müxtəlif ölkələrində qasırğalardan və digər təbii fəlakətlərdən zərər çəkənlərə maliyyə dəstəyi göstərib. "Parkwood Entertainment" leybli vəsaitin yaxın vaxtlarda köçürüləcəyini təsdiqləyib.

Xatırladaq ki, avqustun 10-da baş vermiş 7,4 bal gücündə zəlzələ nəticəsində ölənlərin sayı 300 nəfəri ötüb, dağılan evlərin sayı isə 31 mindən çoxdur.

Almaz Həsənli