ABŞ Suriyanı terrorizmi dəstəkləyən ölkələr siyahısından çıxarıb

ABŞ Dövlət Departamenti Suriyanı təxminən 50 ildir yer aldığı terrorizmi dəstəkləyən dövlətlər siyahısından çıxarıb. Həmçinin, Bəşər Əsəd rejiminin devrilməsindən sonra Suriyada hakimiyyətə gələn "Həyat Təhrir əş-Şam" (HTŞ) qruplaşmasına qarşı tətbiq edilən ABŞ sanksiyaları da ləğv edilib. Oxuməni. az xəbər verir ki, bu barədə ABŞ Maliyyə Nazirliyinin saytında dərc olunan press-relizdə bildirilir.

"Maliyyə Nazirliyi prezident Trampın Suriya xalqına əzəmətli olmaq şansı vermək vədini yerinə yetirir", - deyə qurumun rəhbəri Skott Bessent bildirib. - "Bu gün atılan addımlar siyasi və iqtisadi sabitliyi gücləndirmək üçün Suriyaya əlavə investisiyaların cəlb edilməsinə töhfə verəcək".

Vaşinqton 2024-cü ilin sonunda ölkədə 50 ildən çox hakimiyyətdə olan Əsəd sülaləsi rejiminin devrilməsindən sonra Suriyanı öz sanksiya siyahılarından ardıcıl olaraq çıxarır. Ölkədə hakimiyyəti ələ keçirən HTŞ və onun lideri, müvəqqəti prezident Əhməd əş-Şəra o vaxtdan bəri bir çox Qərb ölkələri, o cümlədən Almaniya və Donald Tramp administrasiyası ilə münasibətləri normallaşdıra biliblər. Bu fonda ABŞ prezidenti hələ 2025-ci ilin iyununda Suriyaya qarşı əvvəllər tətbiq edilmiş sanksiyaların əksəriyyətini ləğv etmişdi.

Suriyanın keçid hökumətinin xarici işlər naziri Əsəd əş-Şeybani ölkənin Vaşinqtonun siyahısından çıxarılmasını "mühüm mərhələ" adlandırıb və Dəməşqin "təcridin nəticələrini aradan qaldırmaq, şəffaflıq, qarşılıqlı maraqlar və hörmətə əsaslanan mühit yaratmaq" istiqamətində işləməyə davam edəcəyinə söz verib.

"Sana" informasiya agentliyinin sitat gətirdiyi Suriyanın müvəqqəti maliyyə naziri Məhəmməd Barniya ABŞ-ın qərarını "Suriya diplomatiyasının tarixi uğuru" adlandırıb. Onun sözlərinə görə, bu addım Suriyanın dünya iqtisadi və maliyyə sisteminə daha dərindən inteqrasiyası, investisiyaların və müasir texnologiyaların cəlb edilməsi, habelə inkişaf imkanlarının genişləndirilməsi üçün "mühüm və çoxdan gözlənilən fürsət" yaradır.

ABŞ-ın Suriya üzrə xüsusi nümayəndəsi Tom Barrak isə öz növbəsində bildirib ki, Suriyanın Vaşinqtonun siyahısından çıxarılması ölkənin "təcriddən tərəfdaşlığa, terror mənbəyindən terrorla qlobal mübarizədə fəal tərəfdaşa" doğru yolunda həlledici addımdır.

Almaz Həsənli