Səkkiz ölkə İsrailin Qəzza ilə bağlı Trampın planından imtina etməsini pisləyib

Misir, İndoneziya, İordaniya, Qətər, Birləşmiş Ərəb Əmirlikləri, Pakistan, Səudiyyə Ərəbistanı və Türkiyənin xarici işlər nazirləri İsrailin ABŞ prezidenti Donald Trampın Qəzza üçün hazırladığı sülh planını həyata keçirməkdən imtina etməsini pisləyiblər. Oxuməni.az xəbər verir ki, bu barədə avqustun 16-da səkkiz ölkənin XİN rəhbərlərinin "X" sosial şəbəkəsində yayımlanan birgə bəyanatında bildirilir.

Söhbət Qəzzada müharibənin dayandırılması və ərazinin sonradan bərpası üçün əsas olmalı olan plandan gedir. Planda nəzərdə tutulan yol xəritəsi bir neçə əsas addımı əhatə edir: hərbi əməliyyatların dayandırılması, Fələstin qruplaşmalarının tərksilah edilməsi, İsrail qoşunlarının çıxarılması, beynəlxalq sabitləşdirmə qüvvələrinin yerləşdirilməsi və Qəzzada yeni idarəetmə sisteminin yaradılması.

Səkkiz ölkə birgə bəyanatda İsraili təklif olunan yol xəritəsindən imtina etməklə Trampın bütün sülh planının icrasını pozmaqda ittiham edib.

Ölkələr, həmçinin İsrailin Fələstin dövlətinin yaradılması ilə bağlı mövqeyini ayrıca pisləyiblər. Onlar bəyan ediblər ki, fələstinlilərin müstəqil dövlətə hüququ var və bu prinsipdən imtina etmək cəhdləri Yaxın Şərqdə sülh və sabitlik perspektivlərinə xələl gətirir.

ABŞ-ın Qəzza ilə bağlı sülh təşəbbüsü Vaşinqtonla sıx müttəfiqlik münasibətlərinə baxmayaraq, məhz İsrailin özü tərəfindən rədd edilib. Bu, ABŞ-ın münaqişə tərəflərinə təklif etdiyi razılaşmaların icrasına təminat vermək qabiliyyəti ilə bağlı suallar doğurur. Bu, xüsusilə Ukrayna üçün Rusiya ilə mümkün yeni danışıqlar kontekstində vacibdir; belə ki, həmin danışıqlarda əsas məqam təkcə sazişin imzalanması deyil, həm də onun icrasının təmin edilməsi olacaq.

Bəyanatda qeyd olunur ki, müharibə dayandırıldıqdan sonra Qəzzanın bərpasına və onun təhlükəsiz idarə olunması üçün şəraitin yaradılmasına keçmək lazımdır. Xüsusilə, inzibati səlahiyyətlərin Qəzzanın İdarə Edilməsi üzrə Milli Komitəyə verilməsi nəzərdə tutulur.

Plan, həmçinin Qəzza ərazisində təhlükəsizliyə təminat verməli olan beynəlxalq sabitləşdirmə qüvvələrinin yerləşdirilməsini də nəzərdə tutur.

Səkkiz ölkə ABŞ-ı prosesə daha fəal təsir göstərməyə və İsraildən Trampın planında nəzərdə tutulan razılaşmaların yerinə yetirilməsini tələb etməyə çağırıb.

Onlar, həmçinin planın həyata keçirilməsində iştirak edən orqan olan Sülh Şurasını yol xəritəsi üzərində işi davam etdirməyə və sülh planının ikinci mərhələsinə keçməyə çağırıblar.

Almaz Həsənli