Cənubi Koreyanın İnçxon hava limanı beynəlxalq sərnişin axınına görə dünya lideri olub

Yeni məlumatlara görə, Cənubi Koreyanın İnçxon hava limanı ilk dəfə olaraq beynəlxalq sərnişin axınına görə dünyanın ən çox yüklənmiş hava limanı olub. Oxuməni.az "Yonhap" agentliyinə istinadən xəbər verir ki, bu barədə "Incheon International Airport Corporation" (IIAC) korporasiyası məlumat yayıb.

Paytaxt Seuldan təxminən 48 kilometr aralıda yerləşən hava limanı ölkənin əsas hava qapısı rolunu oynayır.

Beynəlxalq Hava Limanları Şurasının (ACI) ilkin məlumatlarına əsasən, 2026-cı ilin ilk altı ayı ərzində hava limanı 38,39 milyon beynəlxalq sərnişinə xidmət göstərib.

Böyük Britaniyanın London Hitrou hava limanı 37,79 milyon sərnişinlə ikinci, Sinqapurun Çanqi hava limanı isə 34,53 milyon sərnişinlə üçüncü yerdə qərarlaşıb.

İnçxonda sərnişin axınının kəskin artması qismən ABŞ və İran arasındakı müharibə səbəbindən Yaxın Şərqdə uçuşların pozulması ilə izah edilir. Münaqişə sərnişin axınlarını Dubay kimi əsas hablardan Şərqi Asiya marşrutlarına yönəldib.

Hava limanından verilən məlumata görə, bu ilin birinci yarısında İnçxonda tranzit sərnişinlərin sayı ötən ilin eyni dövrü ilə müqayisədə 18,1% artaraq 4,24 milyon nəfərə çatıb. Avropaya gedən tranzit sərnişinlərin sayı isə illik ifadədə 63,2% artaraq 210 min nəfər təşkil edib.

2001-ci ildə açılan İnçxon hava limanı 158-i beynəlxalq istiqamət olmaqla, 183 şəhərə uçuşlar həyata keçirən 101 aviaşirkətə xidmət göstərir. 2024-cü ildə başa çatan genişləndirmə layihəsi hava limanının illik buraxılış qabiliyyətini 106 milyon sərnişinə çatdırıb.

İnçxon ilk dəfədir ki, beynəlxalq sərnişin axını üzrə dünya reytinqinə başçılıq edir. Bu hava limanı 2002-ci ildə dünyada 10-cu, 2018-ci ildə 5-ci, 2024 və 2025-ci illərdə isə 3-cü yerdə qərarlaşmışdı.

2024 və 2025-ci illərin yekunlarına görə reytinqdə ikinci pillədə olan Dubay Beynəlxalq Hava Limanının bu il ilk beşliyə düşməyəcəyi proqnozlaşdırılır.

Həftənin əvvəlində ACI-nin məlumatları təsdiqləyib ki, Londonun Hitrou hava limanı İstanbul hava limanına məğlub olub və artıq Avropada ümumi sərnişin axınına görə ən çox yüklənmiş hava limanı deyil. İyul ayında London habının terminallarından 7,9 milyon sərnişin keçdiyi halda, İstanbul hava limanı 8,15 milyon nəfərə xidmət göstərib.

Almaz Həsənli