Kolumbiyada güclü zəlzələdən sonra fövqəladə vəziyyət elan edilib

Kolumbiya Prezidenti Abelardo de la Esprielya 7,4 bal gücündə baş verən güclü zəlzələdən sonra ölkə miqyasında fövqəladə vəziyyət elan edib. Bu barədə de la Esprielya vəzifəyə başlamasından üç gün sonra, bazar ertəsi günü bəyan edib. Oxuməni.az xəbər verir ki, məlumatı "El Pais" nəşri yayıb.

"Fəlakətə adekvat reaksiya vermək üçün bütün institusional resurslar səfərbər ediləcək", - deyə "dpa" agentliyi onun sözlərindən sitat gətirib. - "İlk növbədə, dağıntılar altında qalan insanları xilas etmək lazımdır".

Kolumbiya Regional Mərkəzlər Assosiasiyasının məlumatına görə, təbii fəlakət nəticəsində azı 132 nəfər həlak olub, 570 nəfər yaralanıb.

Pereyra, Kali və Manisales də daxil olmaqla bir sıra şəhərlərdə 1500-dən çox yaşayış binasına ciddi ziyan dəyib. Təxminən 60 bina tamamilə uçub. 18 xəstəxana və 52 məktəbə ziyan dəyib. Həlak olanların sayının artacağından ehtiyat edilir.

Zəlzələ avqustun 10-da yerli vaxtla saat 07:34-də (Bakı vaxtı ilə 16:34) baş verib. Kolumbiya Geoloji Xidmətinin (SGC) məlumatına görə, zəlzələnin ocağı ölkənin qərbindəki San-Xose-del-Palmar şəhəri yaxınlığında, təxminən 103 kilometr dərinlikdə yerləşib. Çoxsaylı afterşoklar qeydə alınıb. SGC-dən vurğulayıblar ki, "bu, XXI əsrdə Kolumbiyada qeydə alınan ən güclü zəlzələdir".

ABŞ Dövlət Departamenti avqustun 10-da Kolumbiyaya 15,5 milyon dollar (13,4 milyon avro) məbləğində fövqəladə yardım paketinin ayrıldığını elan edib. Vaşinqtonun rəğbətini qazanan liderdən bəhs edən ABŞ xarici siyasət idarəsi bildirib: "Biz dualarımızda Kolumbiya xalqı ilə birik və Prezident Abelardo de la Esprielyaya dəstək göstərməyə hazırıq".

Qeyd edək ki, Azərbaycan Xarici İşlər Nazirliyi Kolumbiyada baş vermiş zəlzələ ilə əlaqədar həlak olanların ailələrinə və yaxınlarına başsağlığı verib, xəsarət alanlara isə şəfa diləyib.

Almaz Həsənli