Ukrayna Putinin Gelencik yaxınlığındakı sarayını qoruyan hava hücumundan müdafiə sistemlərini məhv edib

Ukrayna elektron müharibə sistemlərinə və obyekti qoruyan S-400 sistemlərinə bir neçə uğurlu hücum həyata keçirib.

Oxuməni.az xəbər verir ki, bu barədə The Moscow Times qəzetində gedən məlumatda deyilir. Qəzet yazır ki, Ukrayna Silahlı Qüvvələri Rusiya diktatoru Vladimir Putinin "sarayı"nın yerləşdiyi Gelencik yaxınlığında Rusiya hava hücumundan müdafiə sistemlərini ardıcıl olaraq məhv edir. 7 avqustda obyektin yaxınlığında Volna Kupol Garant elektron müharibə sistemi məhv edilib. 9 avqustda yaxınlıqdakı S-400 zenit-raket sistemi vurulub.
Nəşrin məlumatına görə, 2156 nömrəli hərbi hissənin ərazisində yerləşən elektron müharibə sisteminin məhv edilməsi peyk görüntüləri ilə təsdiqlənib.

Volna Kupol Garant sistemi Starlink peyk rabitəsini pozmaq və 20 kvadrat kilometr ərazini qorumaq üçün istifadə olunur. Hərbi analitik Yan Matveyevin sözlərinə görə, sistem dronlara qarşı təsirlidir. Lakin onun çatışmazlığı "kiçik bir hərbi baza ölçüsündə olması və havadan asanlıqla müəyyən edilməsi"dir.

Elektron müharibə sisteminin məhv edilməsi Ukrayna dronlarına S-400-ü 500 metr məsafədən vurmağa imkan verdi.

Ukrayna Silahlı Qüvvələrinin Pilotsuz Sistemlər Qüvvələrinin komandanı Robert "Madyar" Brovdi bildirib ki, 9 avqust gecəsi onlar eyni vaxtda altı raket atan yer-hava raket sistemini məhv ediblər.

"Peyk görüntüləri ən azı bir buraxılış qurğusunun məhv edildiyini göstərir... Budur, indi Putinin "sarayı" qorunmamış qalıb", - Matveyev bildirib.

Obyekt Qara dəniz sahilində, Gelencikdən təxminən 20 kilometr aralıda yerləşir.

Əziz Mustafa