Nevroloq kabusların beyin üçün niyə faydalı olduğunu izah edib

Bir çoxları kabusları narahatedici bir əlamət hesab edir, lakin həkimlər sakitləşdirməyə tələsirlər: qorxulu yuxular normaldır və hətta faydalıdır. Beyin bu yolla stressi emal edir və informasiya "zibilindən" qurtularaq "gündəlik təmizlik" aparır. Oxuməni.az xəbər verir ki, bu barədə nevroloq Tatyana Lutskaya " aif.ru" ilə söhbətində bildirib.

"Əslində, kabuslar qorxulu deyil: biz bu yolla stresslə mübarizə aparır və onu yaşayıb keçirik, — deyə ekspert izah edir. — Əgər bəzən narahatlıq içində oyanırsınızsa, bu, beyində nəsə bir pozuntu olduğu anlamına gəlmir".

Bununla belə, əgər kabuslar daimi hal alırsa və insan yatmaqdan qorxursa, həkimə müraciət etmək lazımdır.

Nevroloq vurğulayır ki, məhz gecələr beynin təmizləyici sistemi olan qlimfatik sistem aktivləşir. Bu sistem Altsheymer xəstəliyi ilə əlaqəli olan amiloid də daxil olmaqla, toksik zülalları xaric edir.

Beynə kömək etmək üçün yuxu gigiyenası qaydalarına riayət etmək kifayətdir: yatmazdan üç saat əvvəl qadcetləri kənara qoymaq, otağı qaranlıq etmək və hər gün eyni vaxtda yatmaq lazımdır. Beyni "inkişaf etdirmək" üçün fiziki aktivlik, mütaliə, yaradıcılıq və dil öyrənmək faydalıdır. Həkimin sözlərinə görə, kompüter oyunları isə beyni tənbəlliyə öyrədir.

Almaz Həsənli