Avropa İttifaqı Paramount-un Warner Bros. Discovery ilə sövdələşməsinə şərti olaraq razılıq verib

Avropa İttifaqı çərşənbə günü Warner Bros. Discovery şirkətinin Paramount Skydance-i 110 milyard dollarlıq (94 milyard avro) sövdələşmə ilə almasını təsdiqləyib, lakin bəzi şərtlərlə. Oxuməni.az xəbər verir ki, bu barədə “Euronews” məlumat verib.

Bu sövdələşmənin Avropada film distribütorluğuna təsirindən narahatlığını bildirən Brüssel, Paramount-un Avropa İqtisadi Məkanında (AİM) Universal ilə birgə müəssisəsi olan United International Pictures-dəki payından imtina etməsini tələb edib. AİM-ə Aİ-nin 27 üzv dövləti daxildir.

Avropa tənzimləyiciləri bildiriblər ki, növbəti 10 il ərzində Paramount birbaşa və ya dolayısı ilə Universal ilə Avropa İqtisadi Məkanında filmlərin birgə yayımı ilə bağlı heç bir müqavilə bağlamamalıdır.

Aİ-dən verilən açıqlamada deyilir: «Bu öhdəliklər Avropa Komissiyası tərəfindən müəyyən edilmiş rəqabət narahatlıqlarını tamamilə aradan qaldırır, çünki birləşmiş şirkətin filmlərinin Universal və ya Disney-in filmləri ilə birgə yayılmayacağına zəmanət verir. Komissiyanın nəzarəti altında müstəqil bir etibarlı şəxs bu öhdəliklərin icrasına nəzarət edəcək».

Brüssel bildirib ki, Disney kimi böyük rəqiblərin, Amazon MGM daxil olmaqla daha kiçik Amerika studiyalarının, həmçinin avropalı kino istehsalçılarının mövcudluğunu nəzərə alaraq, sövdələşmənin kino istehsalı sahəsində rəqabətə zərər vurması ehtimalı azdır.

Sövdələşmə ABŞ-da hələ də hüquqi maneələrlə üzləşir; bu həftə Kaliforniyadakı federal hakim birləşməni müvəqqəti olaraq dayandırıb.

İlkin məhkəmə qadağası ilə bağlı dinləmə avqustun 3-nə təyin edilib ki, bu da yekun qərar qəbul edilənə qədər sövdələşmənin tamamlanmasına mane ola bilər.

Planlaşdırılan birləşmə ciddi müqavimətlə qarşılaşıb və tənqidçilər bunun Hollivudun simasını kökündən dəyişə biləcəyi barədə xəbərdarlıq edirlər.

Əgər sövdələşmə baş tutarsa, böyük Amerika kino studiyalarının sayı dördə enəcək. Rəqiblər iddia edirlər ki, bu, kütləvi ixtisarlara, istehsal olunan və nümayişə çıxan filmlərin sayının azalmasına, həmçinin sahədə rəqabətin zəifləməsinə gətirib çıxara bilər.

Almaz Həsənli